Тысячы вернікаў маліліся за Папу Францішка ў Ватыкане

Нягледзячы на дождж, тысячы людзей сабраліся ў панядзелак 24 лютага 2025 года ўвечары на Плошчы Святога Пятра, каб маліцца за Папу Францішка, які знаходзіцца ў шпіталі з сур’ёзнымі праблемамі здароўя.

Кардынал-дзяржсакратар П’етра Паралін, які ўзначаліў малітоўную сустрэчу, давяраючы Папу «магутнаму заступніцтву Маці Божай», прасіў аб падтрымцы ў час выпрабавання і хваробы. Вячэрняя малітва пачалася ў 21.00 і сабрала прадстаўнікоў ватыканскіх дыкастэрый, духавенства і вернікаў.

«Дарагія браты і сёстры, у Дзеях Апосталаў гаворыцца, што Касцёл маліўся няспынна, калі Пятра кінулі ў турму (пар. Дз 12,5). На працягу двух тысяч гадоў хрысціянскі народ моліцца за Папу, калі ён знаходзіцца ў небяспецы ці хворы», — сказаў іерарх. Дзяржаўны сакратар падкрэсліў, што з моманту шпіталізацыі Папы Францішка «інтэнсіўная малітва ўзносіцца за яго да Пана, з боку асобных вернікаў і хрысціянскіх супольнасцей па ўсім свеце», і да гэтай малітвы далучаецца таксама супольнасць работнікаў і іерархаў Рыма і Ватыкана.

«Даверымся магутнаму заступніцтву Найсвяцейшай Марыі, заклікаем Яе асабліва ў малітве як Аздараўленне Хворых. Няхай Яна, клапатлівая Маці, падтрымае яго ў час хваробы і выпрабавання, дапаможа яму хутка вярнуцца да здароўя», — маліўся кардынал Паралін.

Пасля радаснай часткі Ружанца была праспявана антыфона Salve Regina і прачытана Ларэтанская літанія. На заканчэнне прагучала антыфона Oremus pro Pontifice, а кардынал Паралін, які ўзначальваў малітву, удзяліў прысутным благаслаўленне.

88-гадовы Папа Францішак ужо дванаццаты дзень знаходзіцца ў рымскай клініцы Джэмэлі. Ён пакутуе ад інфекцыі дыхальных шляхоў і лёгкіх. У нядзелю 23 лютага 2025 года ўрачы выявілі ў Папы Францішка пачатковую стадыю нырачнай недастатковасці. Нягледзячы на некаторае паляпшэнне паказчыкаў у панядзелак, стан яго здароўя працягвае заставацца сур’ёзным.

Ружанец з’яўляецца, напэўна, самай распаўсюджанай формай каталіцкай малітвы. Звычайна гэта паслядоўнасць з малітвы Ойча наш і дзесяці Вітай, Марыя з разважаннем аб жыцці, смерці і ўваскрэсенні Езуса. Вернікі знаходзяць у гэтай малітве суцяшэнне ў цяжкія часы, а спецыяльныя пацеркі – ружанец – выкарыстоўваюцца як дапаможны сродак падчас малітвы.

Кс. Аляксандр Амяльчэня — беларуская рэдакцыя Vatican News