Пантыфік правёў тэлефонную размову з Прэзідэнтам Украіны

Папа падчас аўдыенцыі з Уладзімірам Зяленскім, 13 мая 2023 года

У тэлефоннай размове Прэзідэнт Украіны выказаў падзяку Папу Францішку за віншаванне са святам Божага Нараджэння, а таксама за падтрымку Формулы міру, у якой удзельнічаюць больш за 80 дзяржаў.

Тэлефонная размова Папы з Уладзімірам Зяленскім адбылася ўвечары 28 снежня 2023 года. Пра гэта Прэзідэнт Украіны паведаміў у сваім вячэрнім відэазвароце, апублікаваным на афіцыйным сайце.

«Толькі што гаварыў з Яго Святасцю Папам Францішкам. Падзякаваў за віншаванне з Божым Нараджэннем для Украіны і ўкраінцаў, за пажаданні міру, справядлівага міру для ўсіх нас. Мы абмеркавалі нашу сумесную працу над Формулай міру: звыш 80 дзяржаў ужо ўдзельнічаюць у ёй на ўзроўні сваіх прадстаўнікоў. Будзе больш. Я ўдзячны Ватыкану за падтрымку нашай працы», — сказаў Прэзідэнт Зяленскі.

13 мая 2023 года Святы Айцец прыняў Прэзідэнта Украіны ў Ватыкане. Гэта была іх першая асабістая сустрэча пасля пачатку вайны. Да гэтага яны сустракаліся ў 2020 годзе.

За час вайны паміж Папам Францішкам і Зяленскім адбылося некалькі тэлефонных размоў. Першая з іх прайшла 26 лютага 2022 года, праз два дні пасля пачатку канфлікту. Каментуючы гэтую размову ў Твітэры, Зяленскі адзначыў, што «Папа, выказаў глыбокі смутак у сувязі з трагічнымі падзеямі, якія адбываюцца ў краіне», і што «ўкраінскі народ адчувае духоўную падтрымку Папы».

Наступная тэлефонная размова адбылася 22 сакавіка 2022 года. Зяленскі паведаміў у Твітэры, што распавёў Папе «аб складанай гуманітарнай сітуацыі і аб заблакаваных расійскімі войскамі гуманітарных калідорах”, адзначыўшы, што «вітаў бы пасрэдніцкую ролю Святога Пасада ў спыненні чалавечых пакут”.

Яшчэ адна тэлефонная размова адбылася 12 жніўня 2022 года. Зноў жа ў Твітэры Прэзідэнт Украіны паведаміў, што распавёў Святому Айцу пра пакуты насельніцтва Украіны, падзякаваў за малітвы і выказаў надзею на яго візіт у Кіеў.

Марыя Валодзіна, беларуская рэдакцыя Vatican News