Каталіцкі Веснік Добрая Вестка ў тваім доме!
Маці Божая асабіста навучыла святога Дамініка маліцца Ружанцам у 1208 годзе і сказала яму, каб ён распаўсюджваў адданасць малітве ружанца і выкарыстоўваў яе як магутную зброю супраць ворагаў праўдзівай веры.
Дамінік (Дамінга) дэ Гусман – святы іспанскі святар, які адправіўся на поўдзень Францыі, каб навярнуць ерэтыкоў-альбігойцаў (катараў), якія адлучыліся ад Касцёла. Дзякуючы пропаведзям, малітвам і ахвярам яму ўдалося навярнуць некаторых з іх. Але вельмі часта, з-за страху абсмейвання альбігойскай большасцю, многія навернутыя зноў адыходзілі ад веры. Святы Дамінік паклаў пачатак рэлігійнаму ордэну для навернутых маладых дзяўчат. Іх манастыр размяшчаўся ў Пруйле, побач з капліцай, прысвечанай Найсвяцейшай Панне. Менавіта ў гэтай капліцы святы Дамінік папрасіў Багародзіцу аб дапамозе, бо адчуваў, што не дасягнуў амаль нічога.
Дзева Маці прыходзіць на дапамогу святому Дамініку дэ Гусману
Дзева Марыя, трымаючы ў руцэ ружанец, з’явілася святому Дамініку ў капліцы і навучыла яго маліцца ім. Яна сказала, каб ён распаўсюджваў гэтую малітву па ўсім свеце, абяцаючы, што ў гэтым выпадку многія грэшнікі навярнуцца і атрымаюць багатыя ласкі. Святы Дамінік выйшаў з капліцы поўны стараннасці і з ружанцам у руках. Ён сапраўды стаў распаўсюджваць ружанец, заклікаючы маліцца ім, і здолеў вярнуць мноства альбігойцаў да каталіцкай веры. Нажаль, адносіны паміж альбігойцамі і хрысціянамі таксама былі звязаныя і з палітыкай, што ў выніку прывяло да вайны. Сымон дэ Манфор, камандуючы хрысціянскай арміяй і адначасова сябар святога Дамініка, папрасіў апошняга навучыць войска маліцца на ружанцы. Яны рабілі гэта з вялікай стараннасцю перад найважнейшай бітвай пры Мюры, у якой войскі ерэтыкоў шматкроць пераўзыходзілі сілы католікаў, але ў выніку былі разгромленыя. Сымон дэ Манфор лічыў гэтую перамогу сапраўдным цудам і вынікам ружанцовай малітвы. У знак сваёй удзячнасці, ён пабудаваў першую капліцу, прысвечаную Найсвяцейшай Панне Марыі Ружанцовай.
Абяцанні Дзевы Марыі тым, хто моліцца на ружанцы
Усё больш мужчын далучалася да Апостальскай справы святога Дамініка, і, з ухвалы Святога Айца, ён заснаваў Ордэн братоў-прапаведнікаў, больш вядомых як дамінікане. З вялікім запалам яны прапаведавалі і навучалі, і ўзрасталі плады іх прац — колькасць навернутых да Госпада павялічвалася. Па меры таго, як ордэн павялічваўся, супольнасці братоў-місіянераў з’яўляліся і ў іншых краінах на славу Бога і Багародзіцы. Ружанец заставаўся ўпадабанай малітвай вернікаў на працягу амаль двух стагоддзяў. Калі ж іх стараннасць пачала слабець, Дзева Марыя з’явілася бласлаўлёнаму Алану дэ Рупе (Алену дэ ла Рош) і сказала, каб ён адрадзіў адданасць гэтай малітве. Найсвяцейшая Панна таксама сказала, што для таго, каб запісаць усе цуды, якія здарыліся дзякуючы ружанцу, спатрэбяцца вялізныя тамы, і паўтарыла абяцанні дадзеныя святому Дамініку адносна ружанца.
Што ж абяцае Маці Божая нам, хто шануе святы ружанец і рэгулярна моліцца на ім?
- Кожнаму, хто будзе Мне верна служыць, молячыся на святым ружанцы, Я абяцаю Маю асаблівую апеку.
- Усім, хто будзе пабожна чытаць Мой ружанец, Я абяцаю асаблівыя Божыя ласкі.
- Ружанец з’яўляецца самай моцнай зброяй супраць пекла. Ружанец знішчыць заганы, выкараніць ерась, вылячыць ад грахоў.
- Расквітнеюць добрыя ўчынкі — ружанец выпрасіць міласэрнасць у Пана Бога для душаў, адверне чалавечыя сэрцы ад любові да зямнога і скіруе іх да любові да Бога і вечнасці. О, колькі душаў будуць асвечаныя гэтай малітвай!
- Душа, якая даручаецца мне праз ружанец, не загіне.
- Тыя, хто будзе пабожна чытаць святы ружанец, разважаючы пры гэтым над яго таямніцамі, не зведае няшчасцяў і Божага гневу, не памрэ раптоўнай смерцю, грэшнік зведае навяртанне, праведнік застанецца ў ласцы і дасягне жыцця вечнага.
- Шчырыя прыхільнікі Майго ружанца не памруць без святых сакрамантаў.
- Хто моліцца на Маім ружанцы, здабудзе пры жыцці і ў гадзіну канання святло і паўнату Божых дабротаў і будзе спрычынены да заслуг Святых.
- Штодня Я вызваляю з чысца душы, якія паважалі Мяне малітвамі святога ружанца.
- Сапраўдныя дзеці Майго ружанца дасягнуць вялікай славы на Небе.
- Тое, аб чым папросіце ў святым ружанцы — атрымаеце.
- Да тых, хто распаўсюджвае Мой ружанец, Я прыйду з дапамогай у любой патрэбе.
- Я атрымала ад свайго Сына запэўненне, што прыхільнікам Майго ружанца — і пры жыцці, і пры кананні — будуць братамі ўсё жыхары неба.
- Тыя, хто моліцца на Маім ружанцы, з’яўляюцца Маімі дзецьмі і братамі Езуса Хрыста — Майго Адзінароднага Сына.
- Шанаванне Майго ружанца — гэта вялікі знак прызначэння для Неба.
Паводле catholickemerovo.ru
для друку
