Каталіцкі Веснік Добрая Вестка ў тваім доме!
“Хто адлучыць нас ад любові Хрыста” (Рым 8, 39). Гэтыя словы з паслання святога апостала Паўла да рымлянаў прыйшлі на думку халодным зімовым ранкам у зале мёрскага Дома культуры.
4 студзеня 2023 года дзеці і моладзь з розных куточкаў Віцебскай дыяцэзіі прыбылі на фестываль каляднай песні “Зорка Бэтлеема”. Нягледзячы на моцны мароз і завеяныя снегам дарогі, далёкія адлегласці, удзельнікі з Мёраў і Браслава, Глыбокага і Варапаева, Полацка, Наваполацка і Віцебска, як і шмат год запар, сабраліся разам, каб праслаўляць Езуса Хрыста – уцелаўлёную, пакорную, дасканалую Любоў.
У гэтым годзе ўдзельнікі прадставілі свае конкурсныя творы ў двух узроставых катэгорыях: дзеці (да 13 год) і моладзь.
Ацэньвала выступоўцаў журы ў складзе ксяндза Сяргея Сурыновіча з Друі, а таксама сясцёр-служабнічак з Віцебска: Люцыны Мусёл і Ёнашы Мровец.
Ганаровым госцем фестывалю стаў ардынарый Віцебскай дыяцэзіі біскуп Алег Буткевіч. Словамі прывітання і падбадзёрвання ён распачаў святочны канцэрт.
Біскуп заўважыў, што сёння да анёльскіх хораў, якія ў нябёсах праслаўляюць Нованароджанага Хрыста, далучаюцца галасы дзяцей і моладзі – удзельнікаў фестывалю.
“Я жадаю Вам поспехаў не толькі зараз, на гэтай сцэне, але і ў штодзённым жыцці.” – прамовіў іерарх і ўдзяліў прысутным пастырскае бласлаўленне.
Распачалася конкурсная праграма, якая была вельмі насычанай і цікавай. Трэба адзначыць, што ўсе ўдзельнікі фестывалю рыхтаваліся да конкурсу вельмі адказна і крэатыўна. На сцэне гучалі традыцыйныя і сучасныя спевы, а таксама разнастайныя жывыя інструменты: сінтэзатар, укулеле, гітара, цымбалы, скрыпка. Кожны гурт і саліст дзяліўся сваімі талентамі, ствараючы сапраўдны святочны настрой, дух каляднай казкі і праслаўлення Хрыста.
Асабліва хочацца адзначыць, што разам з выступоўцамі прыехалі з розных гарадоў і групы падтрымкі, якія не шкадавалі сваіх апладысментаў, усмешак і добрых слоў.
Пасля завяршэння конкурснай праграмы распачалася цырымонія ўзнагароджвання.
Трэба сказаць, што дзякуючы дабрачыннай арганізацыі “Карытас”, мёрскай парафіі Унебаўзяцця Найсвяцейшай Панны Марыі на чале з ксяндзом пробашчам Андрэем Куліком і курыі Віцебскай дыяцэзіі, кожны ўдзельнік вяртаўся дадому з падарункам.
Завяршыўся фестываль супольным здымкам удзельнікаў з біскупам Алегам Буткевічам, а таксама смачным абедам.
На думку журы ў сваіх намінацыях лепшымі сярод моладзі сталі:
У намінацыі “Сола”:
- Кацярына Дземідовіч (Глыбокае)
- Ульяна Казаровец (Варапаева)
У намінацыі “Гурт”:
- Моладзь з парафіі Святой Тройцы (Глыбокае)
У намінацыі “Інструментальная творчасць” – Шамёнак Аляксандр з Мёраў
Сярод дзяцей у намінацыі “Сола” найлепшымі былі:
- Мацкевіч Кіра (Варапаева)
- Бондар Вольга (Мёры)
У намінацыі “Інструментальная творчасць”
- Мазынская Кацярына (Наваполацк)
- Коц Мар’яна (Полацк)
- Дашкевіч Вераніка (Полацк)
У намінацыі “Гурт”:
- Дзеці з парафіі Святой Тройцы (Глыбокае)
- Дзеці з парафіі Нараджэння Найсвяцейшай Панны Марыі (Браслаў)
- Дзеці з парафіі Найсвяцейшага Сэрца Езуса (Наваполацк)
Вялікі фотарэпартаж па спасылцы>>
Вікторыя Філіпенка, тэкст
Марына Сінкевіч, фота
Леанід Юрык, відэа
для друку
