Каталіцкі Веснік Добрая Вестка ў тваім доме!
26 снежня, у дзень Святога Сцяпана першамучаніка, 17 міністрантаў з парафіі святога Міхала Арханёла здзейснілі асаблівую духоўна-пазнавальную экскурсію па гістарычным цэнтры Гродна. Мэтай выезду было паглыбленае знаёмства падрастаючага пакалення з каштоўнай рэлігійнай і культурнай спадчынай горада, дзе кожны храм — гэта жывая старонка гісторыі.
Маршрут экскурсіі ахопліваў найбольш гістарычныя каталіцкія святыні:
Касцёл Святога Францішка Ксаверыя (Фарны), які з’яўляецца адным з чатырох у Беларусі, які мае тытул Малай базілікі. Храм, пабудаваны ордэнам езуітаў, быў урачыста асвечаны ў 1705 годзе ў прысутнасці двух манархаў — цара Пятра I і караля Аўгуста II.
Касцёл Звеставання Найсвяцейшай Панне Марыі (Пабрыгідскі).
Касцёл Узвышэння Святога Крыжа (Пабернардынскі) — найстарэйшы з дзеючых каталіцкіх храмаў у Гродне, будаўніцтва якога вялося з канца XVI стагоддзя.
Францішканскі касцёл, дзе на працягу некалькіх гадоў у міжваенны перыяд служыў святы Максімільян Кольбэ.
Асаблівым пунктам праграмы стала наведванне Міждыяцэзіяльнай Вышэйшай духоўнай семінарыі ў Гродне, якая размяшчаецца ў мурах былога кляштара бернардзінцаў. Тут для міністрантаў семінарысты правялі экскурсію, падчас якой яны пазнаёміліся з рытмам навучання і фармацыі будучых святароў. Хлопцы мелі магчымасць у неафіцыйнай абстаноўцы пагутарыць і папіць гарбаты разам з навучэнцамі, што дазволіла ім лепш зразумець жыццё клерыкаў.
«Гэтая экскурсія — наш уклад у духоўнае развіццё моладзі, — падзяліўся старэйшы міністрант парафіі св. Міхала Арханёла. — Важна, каб хлопцы не толькі служылі ля алтара, але і разумелі глыбіню нашай веры, пабачылі яе гісторыю, ўвасобленую ў гэтых гістарычных мурах, і ведалі, які шлях праходзяць тыя, хто вырашыў прысвяціць сябе выключнаму служэнню Богу, дзеля выратавання душаў».
Выезд скончыўся ўрачыстай святой Імшой у парафіяльным касцёле св. Арханёла Міхала ў свята св. Сцяпана першамучаніка.
для друку
