Каталіцкі Веснік Добрая Вестка ў тваім доме!
Мужчына з самым высокім у свеце зарэгістраваным каэфіцыентам інтэлекту (IQ) прыцягнуў увагу ўсяго свету пасля таго, як публічна заявіў пра сваю хрысціянскую веру ў адной з сацыяльных сетак.
Паўднёвакарэйскі навуковец Йон Хун Кім, які мае самы высокі ў свеце IQ — 276, напісаў у сацыяльнай сетцы: «Як рэкардсмен у свеце па самым высокім IQ, я веру, што Езус Хрыстус — гэта Бог, дарога, праўда і жыццё».
Як паведамляе CNA, сцвярджэнне Кіма пра тое, што ён мае самы высокі ў свеце IQ, было пацверджана такімі арганізацыямі, як The Giga Society, Mensa, World Memory Championship, World Sports Memory Council (у партнёрстве з Guinness World Records) і Official World Records.
У адказ на велізарную папулярнасць свайго першага допісу Кім напісаў на сваёй старонцы, што ён «скарыстаецца гэтай магчымасцю, каб прывесці шмат душ да Бога». «Амэн. Хрыстус — мая логіка», — сказаў 36-гадовы Кім у адказ аднаму з каментатараў.
Катэхізіс Каталіцкага Касцёла вучыць: «Святы Касцёл, наша Маці, верыць і вучыць, што Бог — пачатак і канец усіх рэчаў, можна сапраўды пазнаць натуральным святлом чалавечага розуму на аснове створанага» (ККК, 36). Гэта вучэнне, якое бярэ свой пачатак у дакуменце першага Ватыканскага сабору «Dei Filius», падкрэслівае, што чалавечы розум, назіраючы за парадкам стварэння, можа спасцігнуць існаванне Бога.
Яшчэ ў лютым Кім напісаў у сацыяльнай сетцы: «Бог існуе. Гэта 100%», а нядаўна выказаў такую здагадку: «Наша свядомасць — гэта не проста дзейнасць мозгу. Гэта можа быць квантавая інфармацыя, нешта, што захоўваецца пасля смерці».
Кім з’яўляецца заснавальнікам і генеральным дырэктарам NeuroStory, арганізацыі, якая шукае «рашэнні для здароўя мозгу на аснове штучнага інтэлекту» пры падтрымцы ўрада Паўднёвай Карэі.
Ён таксама заснаваў Аб’яднаную інтэлектуальную асацыяцыю Sigma і ўваходзіць у савет дырэктараў фонду «Lifeboat», які спрыяе навуковым дасягненням, адначасова зніжаючы рызыкі для людзей ад такіх тэхналогій, як штучны інтэлект.
credo.pro
пераклад Марыны Ткач
для друку
