Сусветны саюз каталіцкіх жанчын ініцыяваў дыялог аб міры

У гонар Міжнароднага жаночага дня адбыўся міжрэлігійны вебінар. Ён быў прысвечаны ўнікальнай ролі жанчын у прасоўванні міру, пераадоленні канфліктаў і ўмацаванні надзеі.

5 сакавіка 2026 года ў Рыме прайшла анлайн-сустрэча «Жанчыны веры: носьбіты міру і надзеі». Яе арганізавалі Сусветны саюз каталіцкіх жаночых арганізацый сумесна з Дыкастэрыяй па міжрэлігійным дыялогу. Як падкрэсліваецца ў афіцыйным прэс-рэлізе арганізатараў, у форуме прынялі ўдзел больш за 250 чалавек і прадстаўніцы 6 асноўных рэлігій свету.

Адкрываючы мерапрыемства, прэфект Дыкастэрыі кардынал Джордж Джэйкаб Коавакад адзначыў, што мір не трымаецца выключна на палітычных дамовах. Ён патрабуе пераадолення страху і штодзённай працы па абароне годнасці чалавека.

У сваю чаргу старшыня саюза Моніка Сантамарына дадала, што для жанчын мір з’яўляецца канкрэтнай місіяй. Яна прыгадала словы Папы Льва XIV пра неабходнасць усталявання «бяззбройнага і абяззбройваючага міру» праз нябачнае, але настойлівае служэнне грамадству.

Сваім бачаннем праблемы падзяліліся прадстаўніцы ісламу, будызму, індуізму, юдаізму, каталіцтва і экуменічнага кірунку.

Такія сустрэчы праводзяцца з 2019 года, каб паказаць трагічную рэальнасць сучасных канфліктаў і падкрэсліць здольнасць жанчын ствараць трывалыя адносіны, прыносячы ў свет надзею.

кс. Аляксандр Амяльчэня, беларуская рэдакцыя Vatican News