Каталіцкі Веснік Добрая Вестка ў тваім доме!
З 21 па 28 жніўня пад эгідай касцёла св. Тэрэзы з Авілі ў Шчучыне праходзілі «Канікулы з Богам» – мерапрыемства, якое штогод аб’ядноўвае дзяцей і моладзь парафіі.
На працягу ўжо больш як дваццаці год у апошні тыдзень жніўня касцёл святой Тэрэзы Авільскай у Шчучыне збірае дзяцей і падлеткаў парафіі дзеля таго, каб паразважаць пра Бога, далучыцца да супольнай малітвы і спеваў і проста выдатна правесці час з сябрамі, завесці новыя знаёмствы.
Не стаў выключэннем і гэты год: пад купалам касцёла сабралася больш за 500 маладых парафіян.
Сёлета дзеці, моладзь і святары разважалі аб учынках міласэрнасці для душы бліжняга — суцяшэнні засмучаных, настаўленні грэшнікаў і іншых.
Дэвіз «Канікул з Богам — 2016» супаў з дэвізам Года Божай Міласэрнасці – «Міласэрныя, як Айцец».
Дзень канікул пачынаўся з супольнай малітвы і спеваў. Па заканчэнні спеваў на сцэне ля касцёла можна было пабачыць караценькую тэатральную пастаноўку, у якой абавязкова адлюстроўваўся адзін з ўчынкаў міласэрнасці.
Далей надыходзіў час гульняў і разваг, якія падрыхтоўвалі для сваіх падапечных выхавацелі. Пасля, пачуўшы мелодыю так званай «Бельгійкі», усе разумелі, што пачалася самая гарачая і вясёлая частка праграмы – танцы і ляцелі хутчэй займаць месца, і шукаць партнёра. А на прыканцы дня, пасля малітвы, усе без выключэння атрымлівалі салодкія пачастункі.
Канешне, кожны дзень «Канікул з Богам» быў незвычайным і цікавым, але найбольш чаканымі сталі чацвер і пятніца, калі кожны жадаючы мог паскакаць на батуце, пачаставацца салодкім попкорнам і паўдзельнічаць у спартакіядзе.
Паралельна з агульнай праграмай разваг на сцэне праходзіў конкурс «Голас».
«Канікул з Богам», у якім за тытул лепшага змагаліся як дзеці і падлеткі, так і іх выхавацелі. Галоўным суддзёй конкурса быў спецыяльна запрошаны госць – айцец Аляксандр Махнач SP, які да верасня прошлага года працаваў у шчучынскай парафіі.
Але, як кажуць, усё добрае калісьці заканчваецца. Не сталі выключэннем і нашыя канікулы. Цяпер усім удзельнікам застаецца толькі чакаць наступнага лета, наступнага жніўня і наступных «Канікул з Богам», бо яны – пэўны шлях да адкрыцця свайго сэрца перад Панам Езусам.
Аляксей Саладуха, тэкст;
а.Віталь Слука SP, фота
для друку
