Каталіцкі Веснік Добрая Вестка ў тваім доме!
Час хутка ляціць: здаецца, яшчэ ўчора распачаўся Адвэнт, а ўжо наўкол папрыбіралі батлейкі, скончылі спяваць калядкі, асвяцілі хлеб святой Агаты, перажываем звычайны перыяд і зусім хутка – Вялікі пост.
Час у мамы пралятае яшчэ хутчэй, незалежна нават ад колькасці і ўзросту дзяцей: садочак і школа, урокі, заняткі, хваробы, праца, дамашнія абавязкі… Нельга забывацца пра мужа ды сяброў. Як зрабіць, каб Вялікі пост раптам не прайшоў міма? Трэба загадзя да яго падрыхтавацца.
- Што, дзе, калі?
Ужо не першы раз парадай для пачатку справы з’яўляецца сямейны савет. На ім бацькам варта абмеркаваць, якія набажэнствы, малітвы, сустрэчы, рэкалекцыі адбудуцца ў вашай парафіі? У якія дні, а каторай гадзіне?
Таксама неабходна будзе вырашыць, куды вы хочаце і зможаце пайсці, гледзячы на аб’ектыўныя абставіны ў вашай сям’і? Якім чынам удзельнічаць, напрыклад, у рэкалекцыях: усёй сям’ёй ці паасобку?
Памятайце: чым больш пытанняў вы абмяркуеце і вырашыце, тым больш супакою будзе ў вашым Вялікім посце.
- Хто і якім чынам дапаможа маме перажыць Вялікі пост?
Гэтае пытанне асабліва актуальнае для мам з маленькімі дзецьмі. Маю на ўвазе, тых, каторых нельга пакінуць дома адных, каб пайсці ў касцёл на набажэнствы, споведзь, рэкалекцыі і г.д.
Важна абмеркаваць і вырашыць, хто прыйдзе на дапамогу маме: хто застанецца з дзецьмі або возьме на сябе частку хатніх абавязкаў, падрыхтоўку ўрокаў і іншыя справы, каб яна мела час на падрыхтоўку сваёй душы.
Толькі мама ведае, што патрэбна ёй для падрыхтоўкі душы, чаго асабліва не хапае. Важна падзяліцца гэтымі думкамі і шукаць дапамогі.
У ідэале першы, хто дапаможа, – ваш муж. Але калі па нейкіх прычынах гэта немагчыма, то шукайце іншыя варыянты – сярод сваякоў і сяброў. Варыянты абавязкова знойдуцца.
- Сямейныя пастановы – шлях да паядання
На пачатку Вялікага посту збярыцеся разам, напрыклад, перад вячэрняй малітвай, і абмяркуйце, якія пастановы будзе браць для сябе кожны з чальцоў сям’і. Гэта можа быць добрай сямейнай катэхезай: бацькі патлумачаць сваім дзецям, што такое “пастановы”, навошта мы іх бяром, чаму будзем іх трымацца.
Няхай пастаноў не будзе шмат, можна выбраць нават адну для ўсіх: напрыклад, разам чытаць Божае Слова, хадзіць на крыжовы шлях або разам адмовіцца ад сацыяльных сетах, смачных страў і г.д.
Важна памятаць: вы – дна сям’я, таму падтрымлівайце адно аднаго, асабліва ў часы выпрабаванняў і цяжкасцяў.
- Візуалізацыя
Вось і адбыўся сямейны савет, абмеркаваныя пастановы і дэталі перажывання Вялікага посту. Наступны крок – запішыце ваш план. Як гэта будзе выглядаць – справа індывідуальная. Добры варыянт – проста зрабіць паметкі ў нататніку ці календары з датамі і часам рэкалекцый і набажэнстваў.
Можна ў выглядзе сэрцаў запісаць пастановы і павесіць іх у месцы малітвы, а можна намаляваць плакат “Шлях да Уваскрашэння”. Якім ён будзе, залежыць толькі ад вашай фантазіі.
- Падвядзенне вынікаў
Цудоўным момантам пасля Вялікага посту стане супольнае падвядзенне вынікаў і падзяка Пану Богу за пражыты час. Каб было прасцей, старайцеся хаця б раз на тыдзень запісаць, што атрымалася, у чым удалося стаць хоць крыху лепшымі, якія добрыя ўчынкі былі зробленыя, як вы наблізіліся да Езуса.
Наіўна было б меркаваць, што ўсё атрымаецца на 100% ідэальна. Вы абавязкова сустрэнецеся са спакусамі і цяжкасцямі. Але прыгажосць супольнага перажывання Вялікага посту заключаецца ў набліжэнні да Хрыстовых пакутаў, а праз гэта – да Уваскрашэння. Будзьце падтрымкай адно для аднаго і не спыняйцеся!
Падчас падвядзення вынікаў перш-наперш абмяркуйце маленькія і вялікія “перамогі” кожнага чальца сям’і, прааналізуйце не толькі цяжкасці, але і тое, як атрымалася імі справіцца.
Вікторыя Філіпенка – маладая мама дваіх дзяцей
для друку
