Канікулы з Богам у Шчучыне вачыма моладзі з Мастоў

Вас вітае моладзь з Мастоў. Так здарылася, што ў гэтым годзе, на запрашэнне айцоў піяраў, мы патрапілі ў Шчучын, на канікулы з Богам 2019.

Лета – гэта тая пара, калі чалавек можа больш прысвяціць свайго асабістага часу на праслаўленне Госпада. Прыехаўшы ў Шчучын, мы сталі сведкамі таго, як Пан Бог яднае розных людзей, і тых маленькіх, і трошкі старэйшых, і дарослых.

Тэма гэтых канікул з Богам гучала як «Шчаслівыя тыя, хто слухае і выконвае слова Божае». Разам з усімі ўдзельнікамі канікул з Богам кожны дзень мы перажывалі незабыўныя супольныя хвіліны, сустракаючыся на штодзённых малітвах, гульнях, забавах і танцах.

Дадаткова, кожны вечар для выхавацеляў і старэйшай моладзі былі падрыхтаваныя невялічкія вячоркі: адарацыя Найсвяцейшага Сакраманту, Крыжовы шлях, а таксама праслаўленне спевам нашага Айца на вуліцах горада.

Што найбольш застанецца ў нашай памяці? Думаю дзеці! Прыемна было бачыць усмешкі на іх захопленых тварах, іх радасныя вочы. Гэта быў цудоўны час, мы сапраўды адчулі сябе шчаслівымі.

Хочацца падзякаваць Богу за тое, што ён падараваў нам магчымасць быць там, а асабіста айцоў піяраў, якія ахвотна запрасілі нас на першыя для нас у Шчучыне канікулы з Богам.

З нецярпеннем будзем чакаць наступнага лета, каб зноў сустрэцца з вялікай шчучынскай сям’ёй!

Ганна Лагоцкая, тэкст;
А. Віталій Слука SP, Рыта Янкоўская, фота

 для друку