Каталіцкі Веснік Добрая Вестка ў тваім доме!
Цэнтр дапамогі залежным ад алкаголю і наркотыкаў “Светач” быў створаны пра рыма-каталіцкай парафіі Езуса Валадара Сусвету ў Бягомлі тры гады таму.
Ініцыятарам яго стварэння былі жыхары Наваполацка Уладзімір Шчэпін разам са сваёй жонкай Таццянай. У свой час яны сутыкнуліся з праблемай залежнасці ў сваім жыцці, а зараз самі дапамагаюць цвяроза жыць іншым. Як адзначае спадар Уладзімір, у свой час людзі дапамаглі ім, таму зараз яны адчуваць патрэбу аддаць доўг і дапамагчы іншым людзям. І трэба сказаць, гэта ў іх атрымліваецца!
За тры гады праз Цэнтр прайшло больш за пяцьдзясят чалавек, і амаль трыццаць з іх не ўжывае алкаголь. Гэта даволі добры паказчык іх працы. А яшчэ некалькі чалавек, якія яшчэ нядаўна праходзілі тут рэабілітацыю, засталіся працаваць кансультантамі пры гэтым Цэнтры.
Хаця “Светач” і месціцца пры каталіцкай парафіі, у Цэнтры аказваюць дапамогу ўсім незалежна ад веравызнання. Чалавек можа быць, католікам, праваслаўным, пратэстантам, або зусім не верыць у Бога, тут дапамогуць усім. Галоўнае, каб у рэабілітанта было цвёрдае жаданне кінуць піць.
З нагоды трохгоддзя заснавання Цэнтра “Светач”, якое адзначалася ў нядзелю 14 ліпеня, сюды завітала шмат гасцей з Віцебска, Наваполацка, Полацка, Глыбокага, Паставаў, Мінска, Смалявіч, іншых мясцін Беларусі. Гэта былі і тыя, хто прайшоў праз гэты Цэнтр, і сваякі людзей, якім патрэбна дапамога, і іншыя людзі, якім неабыякавая гэта праблема нашага грамадства. Сярод ганаровых гасцей быў і біскуп Віцебскі Алег Буткевіч.
Паколькі, па словах іерарха, Бог у любой справе павінен быць на першым месцы, святкаванне распачалося са святой Імшы, якую цэлебраваў віцебскі ардынарый. Была і яшчэ адметная падзея ў гэты дзень: перад Імшой айцец Тадэвуш Кавальскі пахрысціў дзіця з гэтай парафіі.
У сваім слове да вернікаў біскуп закрануў тэму ўнутранай свабоды чалавека. Ён звярнуў увагу на парадаксальны на першы погляд факт: чалавек толькі тады па сапраўднаму свабодны, калі ў нечым сябе абмяжоўвае. І тут якраз падыходзіць прыклад з алкаголем: калі не абмежаваць яго спажыванне, то чалавек становіцца не свабодным, а якраз яго рабом.
Дапамагчы ж заставацца ў рамках свабоды нам і дапамагаюць Божыя запаведзі, якія, на першы погляд, у нечым нас і абмяжоўваюць. А абмяжоўвае нас наш унутраны засцерагальнік, які мы называем сумленнем. Іерарх звярнуў увагу на той факт, што ў розных рэлігіях, у розных народаў гэтыя абмежаванні шмат у чым падобныя. Гэта можа сведчыць аб боскай прыродзе чалавека.
Напрыканцы Імшы біскуп блаславіў усіх прысутных.
Пасля Імшы ўсе накіраваліся ў Дом культуры, дзе адбылася асноўная частка сустрэчы. Распачалі яе кіраўнік Цэнтра Уладзімір Шчэпін і біскуп Алег. Падчас сустрэчы праходзілі розныя псіхалагічныя трэнінгі, абмен вопытам, проста цікавыя гутаркі.
Зміцер Лупач, тэкст
Леанід Юрык, фота
Падрабязнасці з’явяцца на нашым сайце крыху пазней.
для друку
