26 гадоў турмы для біскупа, які адмовіўся пакінуць краіну

Біскуп Раланд Альварэс

Суд Нікарагуа прысудзіў каталіцкага біскупа Матагальпы Раланда Альварэса да 26 гадоў пазбаўлення волі на наступны дзень пасля таго, як той адмовіўся сесці на борт самалёта, які перавозіў 222 палітычных зняволеных у выгнанне ў ЗША.

Суд прызнаў 56-гадовага іерарха “здраднікам краіны” і пастанавіў, што ён не будзе вызвалены з турмы да 2049 года. Ён быў пазбаўлены нікарагуанскага грамадзянства і аштрафаваны на 1600 долараў.

Паліцыя арыштавала біскупа Альварэса ў жніўні 2022 года. Суды абвінавацілі яго ў “змове” і распаўсюдзе “фальшывых навін”. Іерарх адкрыта крытыкаваў тое, што лічыў абмежаваннем рэлігійнай свабоды з боку левага рэжыму Артэгі.

Адносіны паміж Каталіцкім Касцёлам і ўладамі Нікарагуа знаходзяцца ў крызісе з 2018 года, калі пратэстоўцы, якія патрабавалі адстаўкі прэзідэнта, схаваліся ў храмах. Тады Артэга абвінаваціў католікаў у саўдзеле ў спробе дзяржаўнага перавароту, нібыта ініцыяванага Вашынгтонам. Улады выслалі з краіны апостальскага нунцыя, арцыбіскупа Вальдэмара Зомертага, а ў ліпені – 18 сясцёр з Ордэна місіянерак любові.

На заканчэнне сустрэчы з вернікамі на малітве Анёл Панскі, якая 12 лютага 2023 года прайшла ў Ватыкане, Папа Францішак звярнуў увагу на драматычную грамадска-палітычную сітуацыю ў Нікарагуа.

“Навіны, якіх прыходзяць з Нікарагуа, вельмі засмуцілі мяне, і тут я не магу не ўспомніць з трывогай Біскупа Матагальпы Раланда Альварэса, якога я вельмі люблю, асуджанага на 26 гадоў зняволення, а таксама людзей, якія былі дэпартаваны ў Злучаныя Штаты. Я малюся за іх і за ўсіх тых, хто пакутуе ў гэтай дарагой краіне, і прашу аб вашай малітве”, — падкрэсліў Святы Айцец.

“Давайце папросім таксама Пана, каб праз заступніцтва Беззаганнай Панны Марыі адкрыў сэрцы палітычных лідараў і ўсіх грамадзян на шчыры пошук міру, які нараджаецца з праўды, справядлівасці, свабоды і любові і дасягаецца праз цярплівае практыкаванне дыялогу”, — дадаў Папа, заклікаючы вернікаў да багародзічнай малітвы.

Па матэрыялах беларускай рэдакцыі Vatican News