Каталіцкі Веснік Добрая Вестка ў тваім доме!
Ілюстрацыйнае фота
У самым сэрцы Лондана, на знакамітай велізарнай Трафальгарскай плошчы, тэатр Wintershall у 16-ы раз прадставіць рэалістычны спектакль «Страсці Хрыстовы».
Спектаклі на плошчы, прысвечанай перамозе адмірала Нэльсана над французскім і іспанскім флотамі пры Трафальгары (1805), сталі важнай часткай святкавання Вялікага тыдня ў Лондане і галоўнай турыстычнай славутасцю.
Штогод у Вялікую пятніцу яны прыцягваюць дзясяткі тысяч гледачоў — лонданцаў і турыстаў з усяго свету. Тэатр з графства Сурэй каля Брэмлі спецыялізуецца на манументальных вулічных пастаноўках самых вядомых біблейскіх сцэн. У гэтым грандыёзным відовішчы ўдзельнічаюць дзясяткі акцёраў у гістарычных касцюмах, а таксама жывёлы. Спектакль рэканструюе арышт, суд, распяцце Езуса і абвяшчэнне яго ўваскрэсення. Кіраўніцтва тэатра папярэджвае, што «Страсці Хрыстовыя» і распяцце прадстаўлены вельмі рэалістычна і кранальна, і заклікае бацькоў звяртаць асаблівую ўвагу на тое, як іх дзеці рэагуюць на спектакль.
Спектакль не толькі для хрысціян
Прадзюсар спектакля Шарлота дэ Клее пераканана, што гісторыя Езуса па-ранейшаму моцна прыцягвае людзей, асабліва ў сучасным свеце, адзначаным нявызначанасцю і ўзброенымі канфліктамі.
Яна адзначыла, што гэты аповед пра пакуты, ахвяру і надзею, безумоўна, прыцягвае не толькі хрысціян. Яна падкрэсліла, што найбольш драматычныя сцэны ў спектаклі суправаджаюцца адчувальнай напружанасцю і поўнай цішынёй. «Гэта адзіныя моманты, калі шумная і заўсёды перапоўненая плошча замірае», — прызнаецца яна.
Мэр Лондана Садык Хан сказаў, што «Страсці Хрыстовы» ператвараюць Трафальгарскую плошчу ў буйны культурны цэнтр, «дзе лонданцы і наведвальнікі могуць збірацца разам і разважаць над вельмі важнымі пытаннямі, незалежна ад сваёй рэлігіі. Тым больш, што пасланне аб спагадзе, любові і надзеі з’яўляецца ўніверсальным».
stacja7.pl
Пераклад Марыны Ткач
для друку
