Каталіцкі Веснік Добрая Вестка ў тваім доме!
З 17 па 19 ліпеня ў Міждыяцэзіяльнай вышэйшай духоўнай семінарыі ў Гродне прайшлі рэкалекцыі для юнакоў на тэму распазнання паклікання.
У іх удзельнічалі міністранты з розных частак Гродзенскай дыяцэзіі і іншых месцаў. Рэкалекцыі давалі магчымасць разам памаліцца, падзяліцца досведам служэння пры алтары, пазнаёміцца з жыццём семінарыі, адпачыць.
Кіраўніком быў кс. Павел Скуба, які ўжо не першы раз арганізоўвае такія рэкалекцыі. Гэтыя духоўныя практыкаванні праходзілі пад назвай “Давід — чалавек, сэрца якога шукала Бога”. На працягу трох дзён удзельнікі разважалі над постаццю старазапаветнага караля Давіда, яго якасцямі і духоўным шляхам.
Распачаліся рэкалекцыі супольнай малітвай, потым адбылася Імша, якую цэлебраваў рэктар семінарыі кс. Ян Раманоўскі. У звароце да ўдзельнікаў ён звярнуў увагу на важнасць такіх сустрэч, назваўшы іх добрай магчымасцю паразважаць пра ўласны шлях і знайсці новых сяброў.
Пасля супольнага пасілку адбылася сустрэча з рэктарам, ксяндзом Паўлам і семінарыстамі. Удзельнікі рэкалекцый задавалі пытанні пра хобі святароў, вучобу ў семінарыі і шлях паклікання. Студэнты семінарыі распавялі пра свой досвед распазнання паклікання, святары падзяліліся гісторыямі ўласнага духоўнага шляху. Дзень завяршыўся супольнай адарацыяй са спевамі і малітвай.
У другі дзень рэкалекцый адбылася канферэнцыя, у межах якой ксёндз Павел засяродзіў увагу на жыцці Давіда, калі той быў пастухом, яго малітоўным досведзе і пакаянні. Як і ў першы дзень, юнакі ўдзельнічалі ў Імшы і малітвах.
Быў час для адпачынку ў братэрскай атмасферы ў кавярні. Перад вячэрай адбылася ружанцовая малітва ў інтэнцыі распазнання жыццёвага шляху. Вечар быў прысвечаны актыўнаму адпачынку: гульні ў тэніс, більярд, футбол, відэапрыстаўку і прагляд фільма давалі ўдзельнікам магчымасць пазнаёміцца бліжэй. Чарговы дзень рэкалекцый скончыўся малітвай.
Заканчэннем рэкалекцый сталі Імша ў гродзенскай катэдры і супольны абед, на якім юнакі маглі падзяліцца ўражаннямі. На памяць аб удзеле ў рэкалекцыях яны атрымалі ад семінарыі невялікія падарункі.
для друку
