Святы Айцец да моладзі: споведзь – сакрамант радасці

Самай вялікай марай у жыцці чалавека з’яўляецца любоў, якая, аднак, патрабуе высілкаў, як і ўсё вялікае ў жыцці, нагадаў Папа Францішак славацкай моладзі, з якой сустрэўся 14 верасня 2021 года ў горадзе Кошыцы.

“Сябры, не будзем баналізаваць любоў, бо гэта не толькі эмоцыя ці пачуццё, яны бываюць толькі на пачатку. Любоў не значыць мець “усе і адразу”, не адпавядае логіцы “выкарыстай і выкінь”. Любоў – гэта вернасць, дар, адказнасць”, — падкрэсліў Пантыфік у сваёй прамове. Папа нагадаў моладзі, што для таго, каб зрабіць жыццё вялікім, патрэбныя любоў і гераізм, якія можна знайсці ва ўкрыжаваным Хрысце.

Святы Айцец заклікаў памятаць, што кожны чалавек выключны, кожны з’яўляецца дарам і можа зрабіць дар з уласнага жыцця. “Іншыя людзі, грамадства, бедныя вас чакаюць”, — сказаў ён, заклікаючы моладзь пераадолець страх перад стварэннем сям’і, нараджэннем і выхаваннем дзяцей, дзяленнем усім з іншай асобай.

Папа Францішак заклікаў юнакоў і дзяўчат памятаць пра свае карані і быць “падлучанымі да жыцця”, заўсёды адкрытымі на іншых, не паддавацца смутку і песімізму. “Мы былі створаны не для таго, каб хадзіць з паніклым тварам, але, каб уздымаць позірк да Неба”, — нагадаў ён.

Перад абліччам падзенняў і слабасцяў Папа параіў прыступаць да сакраманту споведзі, на падабенства дзяцей, “што спяшаюцца трапіць у абдымкі Айца”, які можа вырашыць усе сітуацыі і прабачае ўсе грахі. Францішак назваў споведзь “сакрамантам радасці”, якую важна захоўваць у сэрцы.

Святы Айцец заклікаў моладзь не баяцца крыжа ў жыцці, а пераадольваць цяжкія сітуацыі разам з Хрыстом, які з’яўляецца крыніцай надзеі і радасці. “Я жадаю вам такой радасці, мацнейшай за ўсё. Жадаю, каб вы неслі яе вашым сябрам. Не пропаведзі, а радасць. Не словы, а ўсмешкі, братэрскую блізкасць”, — сказаў Папа Францішак на заканчэнне сустрэчы.

Аляксандр Панчанка, беларуская рэдакцыя Vatican News

для друку для друку