Каталіцкі Веснік Добрая Вестка ў тваім доме!
Брытанскі мільянер Сэмюэл Лідс паставіў перад сабой незвычайную мэту: ён хоча выкупіць выстаўленыя на продаж будынкі святынь, каб выратаваць іх ад зносу або пераўтварэння ў камерцыйныя аб’екты.
34-гадовы інвестар, які разбагацеў на рынку нерухомасці, заяўляе, што не шукае прыбытку, а хоча адказаць на духоўныя патрэбы маладога пакалення. Яго ініцыятыва супадае з рэкорднай колькасцю навяртанняў у Лондане, што дае надзею на будучыню хрысціянства ў Вялікабрытаніі.
Місія вышэй за прыбытак
Сэмюэл Лідс — персанаж, які дамінаваў у загалоўках брытанскай прэсы ў 2023 годзе. Ужо ва ўзросце 25 гадоў ён назапасіў шматмільённы стан у сектары нерухомасці, заснаваў інвестыцыйную кампанію і стаў аўтарам шырока чытаных кіраўніцтваў. Аднак менавіта яго апошняя заява найбольш узрушыла грамадскую думку. Лідс абвясціў сотням тысяч сваіх падпісчыкаў, што мае намер выкупіць касцёлы ў Вялікабрытаніі, перш чым яны знікнуць з карты горада або апынуцца ў руках забудоўшчыкаў.
«Калі нешта было пабудавана як касцёл, каб праслаўляць Бога, яно не можа стаць чымсьці іншым», — сцвярджае прадпрымальнік. Пры гэтым ён цвёрда падкрэслівае, што ў гэтай канкрэтнай дзейнасці не кіруецца жаданнем павялічыць сваё багацце. Лідс прызнаецца, што яму сумна, калі ён атрымлівае прапановы аб продажы рэлігійных будынкаў, і ён стаміўся назіраць, як гістарычныя святыні руйнуюць з зямлёй.
Адраджэнне веры сярод моладзі
Дзеянні Лідса — гэта не проста сентыментальны жэст, а, як ён сам сцвярджае, адказ на зменлівую сацыяльную рэальнасць. Інвестар бачыць «адраджэнне веры сярод маладога пакалення» ў Вялікабрытаніі. Па гэтай прычыне ён лічыць, што гістарычныя будынкі павінны заставацца адкрытымі і гатовымі прыняць вернікаў. «Англіі патрэбныя адкрытыя святыні. Яны патрэбныя нам жывымі», — падкрэслівае ён у паведамленнях у сацыяльных сетках.
Гэтыя назіранні пацвярджаюцца статыстыкай, якая можа здзівіць многіх сацыёлагаў рэлігіі. Нягледзячы на тое, што многія храмы ўсё яшчэ сутыкаюцца з недахопам фінансавання, брытанская сталіца перажывае своеасаблівы духоўны рэнесанс. На мінулы Вялікдзень у Лондане назіралася найбольшая колькасць навяртанняў за апошнія 15 гадоў.
У гэтым кантэксце місія Сэмюэля Лідса набывае больш глыбокі сэнс. Гэта не проста барацьба за архітэктурныя помнікі, але і за прастору для супольнасці, якая, насуперак распаўсюджанаму меркаванню пра ўзмацненне секулярызацыі, здаецца, зноў шукае свае карані. Калі бачанне маладога мільянера спраўдзіцца, брытанскія вуліцы могуць зноў змяніць свой твар, паставіўшы крыж у месца, дзе ў апошнія дзесяцігоддзі пераважаў выключна гандаль.
Такім чынам, запал аднаго чалавека, падмацаваны яго велізарным багаццем, становіцца магчымасцю на тое, што гістарычная спадчына стане не проста ўспамінам аб ранейшай веры, а падмуркам для яе сучаснага адраджэння. Гэта важны ўрок аб тым, што капітал у спалучэнні з асабістым сведчаннем можа служыць справам значна больш трывалым, чым квартальны прыбытак.
deon.pl
Пераклад Марыны Ткач
для друку
