Каталіцкі Веснік Добрая Вестка ў тваім доме!
Папа Францішак прызначыў айца Аляксандра Язлавецкага дапаможным біскупам Кіева-Жытомірскай дыяцэзіі Рыма-каталіцкага Касцёла ва Украіне, інфармуе credo.pro. Пра гэта паведамілі ў Ватыкане 18 верасня.
Як вядома, ардынарыем Кіева-Жытомірскай дыяцэзіі з’яўляецца Віталь Крывіцкі, які пасля прызначэння і пасвячэння папрасіў Святога Айца аб дапаможным біскупе.
Гэта вельмі вялікі давер з боку Святога Айца
Біскуп-намінант пракаментаваў сваё прызначэнне:
— Каля двух тыдняў таму я пачуў, што мяне прызначаюць біскупам.
Я разумею, што гэта вельмі вялікая адказнасць і заданне, таму я паехаў да сясцёр кармелітак у Кіеў, каб правесці дзень у маўчанні і роздуме.
Пасля дня цішыні і разважанняў над Божым словам я ўнутрана пагадзіўся з гэтай прапановай.
Мне таксама дапамагала падтрымка і словы майго духоўнага айца, які мяне ведае, асабліва з боку чалавечага і слабога.
У хуткім часе я паеду на некалькі дзён на рэкалекцыі ў маўчанні ў Чэнстахову (Польшча).
Гэта вельмі вялікі давер да мяне з боку Святога Айца. Таму я вельмі прашу сваіх родных, сяброў і блізкіх мне людзей працягваць маліцца за мяне.
Я вельмі спадзяюся на падтрымку маіх святых заступнікаў, асабліва святога Тамаша Мора, і душ, якія знаходзяцца ў чысцы. Я таксама вельмі прашу ўсіх вернікаў Каталіцкага Касцёла маліцца за мяне ў гэтым служэнні, асабліва тых, хто штодня падтрымлівае мяне.
Біяграфія
Аляксандр Язлавецкі нарадзіўся 2 сакавіка 1979 года ў Шаргародзе Вінніцкай вобласці. Пасля вучобы ў школе і ПТВ паступіў у Вышэйшую духоўную семінарыю Святога Духа ў горадзе Гарадок Хмяльніцкай вобласці. Святарскае пасвячэнне прыняў у 2004 годзе ад біскупа Лявона Дубраўскага. Працаваў вікарыем у в. Мурафа ў Вінніцы і выхавацелем у Гарадоцкай семінарыі.
З 2006 г. працягваў вучобу ў Папскім латэранскім універсітэце ў Рыме, дзе абараніў доктарскую ступень па кананічнаму праву. Вярнуўшыся з Рыма, працаваў у семінарыі на пасадзе прарэктара. А з 2014 па 2018 год — рэктар Вышэйшай духоўнай семінарыі Камянецка-Падольскай дыяцэзіі.
З 13 жніўня 2018 года яго накіравалі на працу ў Кіева-Жытомірскую дыяцэзію, дзе ён працаваў канцлерам і мадэратарам курыі. 18 верасня 2019 года прызначаны дапаможным біскупам Кіева-Жытомірскай дыяцэзіі.
Малады касцёл
Аляксандр Язлавецкі стане першым біскупам з Шаргарада і першым біскупам-выпускніком семінарыі Камянецка-Падольскай дыяцэзіі. Ён таксама ўваходзіць у лік наймалодшых каталіцкіх біскупаў свету. І што цікава, яны ўсе з Украіны. Біскуп УГКЦ Пётр Лоза застаецца самым маладым біскупам. Аляксандр Язлавецкі, які старэйшы за яго ўсяго на тры месяцы, стане другім маладым каталіцкім біскупам у свеце. А Эдвард Кава, які падчас намінацыі і пасля пасвячэння быў самым маладым біскупам, зараз пераходзіць на трэцяе месца. Дарэчы, чацвёрты і пяты па чарзе самыя маладыя біскупы таксама ўкраінцы. Таму Касцёл ва Украіне, які цалкам дыхае дзвюма лёгкімі, можна смела назваць маладым.
Пераклад Марыны Сінкевіч для catholicnews.by
для друку
