Каталіцкі Веснік Добрая Вестка ў тваім доме!
22 лютага, у першы дзень выстаўлення, рэліквіі святога Францішка ўшанавалі 18 тысяч пілігрымаў — амаль паўтары тысячы вернікаў кожную гадзіну. Паводле ацэнак, на працягу 30 дзён каля 400 тысяч вернікаў наведаюць і ўшануюць рэліквіі Асізскага Бедняка.
Засяроджана, кранальна, без сэлфі.
Як кажуць айцы-францішкане з кляштару Сакра-Канвента, наведванне адбываецца ў атмасферы засяроджанасці, малітвы, цярпення і спакою.
«Гэта праўда — святы Францішак жывы!» — сказаў айцец Джуліа Чэзарэа OFMConv, кіраўнік аддзела камунікацый асізскага францішканскага кляштару Сакра-Канвента.
«Тысячы людзей у атмасферы засяроджанасці, але таксама і радасці, увайшлі ў базіліку, каб пакланіцца смяротным парэшткам святога Францішка і пачуць у сваіх сэрцах яго ціхае слова дабрыні, якое падтрымлівае і дапамагае нам узрастаць.
Адчувальным знакам гэтай радаснай, але ўрачыстай атмасферы з’яўляецца цішыня, якая акружае базіліку: ніякіх мабільных тэлефонаў, ніякіх сэлфі, толькі глыбокія эмоцыі і духоўнасць. Мы шчыра дзякуем усім, хто прыйшоў, хто любіць Францішка і хто супрацоўнічае з намі, братамі, каб зрабіць гэтую падзею сапраўдным момантам братэрства».
Кожны пілігрым атрымлівае спецыяльную брашуру, а таксама падрыхтаваны спецыяльны часопіс пра святога Францішка як заступніка Італіі. Пачынаючы з 24 лютага, ён будзе даступны пры куплі газеты «Avvenire».
Амаль 400 тысяч зарэгістраваных пілігрымаў
Мерапрыемствы, звязаныя з публічным выстаўленнем рэліквій святога Францішка, асвятляюць 200 журналістаў, акрэдытаваных у Асізі, у тым ліку італьянскі тэлеканал RAI.
Гэтая першая ў гісторыі публічнае выстаўленне парэшткаў святога Францішка была арганізавана ў гонар Года Францішка — 800-годдзя пасля смерці бедняка з Асізі.
Паводле deon.pl
Фота: Vatican Media
Пераклад Марыны Ткач
для друку
