У Рыме пачаліся курсы для 147 новых біскупаў з пяці кантынентаў

Фармацыйныя курсы для 147 новых біскупаў з пяці кантынентаў пачаліся 2 верасня 2026 года ў Рыме і завершацца сустрэчай з Львом XIV.

2 верасня 2026 года пачаліся штогадовыя курсы фармацыі для новых біскупаў. Такія сустрэчы праводзяцца з 2000 года. Сёлета ў Рым прыехалі 147 пастыраў з пяці кантынентаў, у тым ліку з Індыі, Конга, Папуа-Новай Гвінеі, Зімбабвэ, Кыргызстана і Тайланда. Пра гэта паведамляе карэспандэнт Vatican News Сальваторэ Чэрнуцыа.

98 біскупаў удзельнічаюць у праграме, арганізаванай Дыкастэрыяй па справах біскупаў, пад назвай «У Хрысце – захавальнікі “Magnifica humanitas” у час перамен». Яшчэ 49 пастыраў праходзяць курс Дыкастэрыі па евангелізацыі «Служыцелі еднасці ў Касцёле».

У праграме курсаў – літургія, місія, абарона непаўналетніх, пытанні злоўжыванняў, кіравання, правасуддзя і празрыстасці, а таксама сінадальнасць, фармацыя святароў і міжрэлігійны дыялог.

Курсы Дыкастэрыі па справах біскупаў 2 верасня 2026 года ўвечары распачаліся дакладам кардынала Артура Рошэ, прэфекта Дыкастэрыі па справах Божага культу і дысцыпліны сакрамэнтаў. У наступныя дні ўдзельнікі будуць абмяркоўваць служэнне біскупа, яго місію ў сям’і і грамадстве, абарону непаўналетніх, культурныя змены і пытанні, звязаныя з духоўным жыццём і сумленнем.

Курсы Дыкастэрыі па евангелізацыі распачынаюцца 3 верасня 2026 года ў Папскім місійным калегіуме Святога Пятра Апостала і будуць прысвечаны, сярод іншага, выклікам у місійных Касцёлах, жыццю духавенства, кансэкраванаму жыццю, міжрэлігійнаму дыялогу, сектам і кананічнаму праву.

7 верасня 2026 года абедзве групы сустрэнуцца ў Папскім Урбаніянскім універсітэце. Праграма працягнецца да 10 верасня 2026 года, калі пасля Імшы ў Базіліцы Святога Пятра новыя біскупы сустрэнуцца з Львом XIV.

кс. Аляксандр Амяльчэня, беларуская рэдакцыя Vatican News