Вэбінар аб ролі Яна Паўла ІІ ў адраджэнні Касцёла ў СССР

Св. Ян Павел ІІ падчас візіту ў Літве. Верасень 1993 г. (Vatican Media)

18 чэрвеня Папскі грыгарыянскі ўніверсітэт у Рыме правядзе вэбінар, прысвечаны ролі св. Яна Паўла ІІ у адраджэнні і дзейнасці Каталіцкага Касцёла ў СССР.

Нагодай стала 30-я гадавіна падпісання так званага Белавежскага пагаднення, што азначала канец існавання СССР і з’яўленне 15 незалежных краін.

Падчас сустрэчы будзе прадстаўлены другі том калектыўнага 1200-старонкавага даследавання «Ян Павел II і Каталіцкі Касцёл у Савецкім Саюзе і ў краінах, якія паўсталі ў выніку яго распаду», што выйшаў у выдавецтве Gabrielli. Першы том апублікавалі ў 2020 г., ён быў прысвечаны адносінам Яна Паўла ІІ з Касцёламі ў Цэнтральнай і Усходняй Еўропе. Рэдактарам выступіў кс. Ян Мікрут, дэкан Факультэта гісторыі і культурных каштоўнасцей Касцёла ў Грыгарыянскім універсітэце.

На прэзентацыі будуць прысутнічаць кардынал Леанарда Сандры, прэфект Кангрэгацыі Усходніх Касцёлаў, і кардынал Сігітас Тамкявічус, арцыбіскуп-эмерыт Каўнаскі. Мадэратарам сустрэчы будзе італьянская журналістка Анджэла Амбражэці – дырэктар міжнароднага каталіцкага агенцтва ACI Stampa.

Змены, аб якіх пойдзе гаворка падчас вэбінара, прыпалі на сярэдзіну пантыфікату св. Яна Паўла ІІ, які не толькі быў іх сведкам, але і ў значнай ступені сааўтарам. Ён здзейсніў пяць Апостальскіх падарожжаў у восем постсавецкіх краін: Літву, Латвію і Эстонію (1993), Грузію (1999), Украіну (2001), Казахстан і Арменію (2001), а таксама Азербайджан (2002).

У анлайн-сустрэчы могуць прыняць удзел усе жадаючыя пасля абавязковай рэгістрацыі па спасылцы.

Ян Глінскі, беларуская рэдакцыя Vatican News

для друку для друку