Каталіцкі Веснік Добрая Вестка ў тваім доме!
Паважаныя браты і сёстры ў Хрысце, дарагія вернікі!
“Не бойцеся, ведаю што вы шукаеце Езуса ўкрыжаванага, няма Яго тут, Ён уваскрос, як сказаў…” (Мц 28, 5-6). Словы Анёла, якога сустрэлі жанчыны на досвітку каля магілы, дзе было пакладзена цела Езуса, наноў абвяшчаюць нам радасную вестку пра вялікую перамогу Езуса Хрыста над грахом і смерцю і Яго прысутнасць сярод нас!
Хрыстос уваскрос! Сапраўды ўваскрос! Мы паўтараем гэтыя словы ўслед за незлічонай колькасцю хрысціянаў, якія на працягу вякоў на гэтай праўдзе будавалі сваё жыццё і падмурак той цывілізацыі, да якой мы з вамі належым. Вера ва ўваскрасенне была верай найперш Апосталаў, якія не маглі маўчаць “…пра тое, што… бачылі і чулі”. (Дз 4, 20). Яны былі першымі сведкамі таго, што ўчыніў Езус, прабываючы на зямлі, а таксама сведкамі Яго пакутаў, смерці і ўваскрасення.
Шмат хто сёння, выкарыстоўваючы аргумент апостала Тамаша, кажа: “пакуль не ўбачу – не паверу!” Але няхай перад нашымі вачыма заўсёды стаіць вобраз гэтага ж Апостала, які, дакрануўшыся да ран на целе Уваскрослага Настаўніка, сказаў: “Пан мой і Бог мой!” І праз нявернага Тамаша на нас няхай сыходзіць бласлаўленне Хрыста для тых, хто не бачыў, а паверыў.
Разам з тым знакаў дзеяння Уваскрослага Хрыста сярод свайго народа ёсць вельмі шмат. І я хачу пажадаць, каб зноў і зноў мы адкрывалі Яго прысутнасць у сваім жыцці. Няхай Велікодныя Святы адновяць нашую веру і прынясуць супакой і радасць, якія дае ўдзел у перамозе Хрыста над грахом і смерцю! Прыняцце Уваскрослага Хрыста няхай дапаможа нам жыць у згодзе і прабачэнні як паміж роднымі і блізкамі, так і паміж усімі вызнаўцамі Езуса, бо для Яго мы ўсе дзеці Божыя, якім падрыхтаваны ўдзел у Валадарстве Нябесным.
Жадаю ўсім радасных Святаў, здароўя, супакою і Божага бласлаўлення!
Хрыстос Уваскрос! Аллелюя!
+ Алег Буткевіч,
Біскуп Віцебскі
для друку
