Што азначае слова «экуменічны»?

На працягу апошняга стагоддзя Касцёл надаваў вялікую ўвагу ўз’яднанню ўсіх хрысціян. Гэта складаная задача, бо за дзве тысячы гадоў паміж хрысціянамі было незлічонае мноства падзелаў.

Аднак мы ўсё ж спадзяемся, што кожны наступны год будзе набліжаць нас да адзінства.

Слова «экуменічны» часта выкарыстоўваецца ў любых спробах аб’яднаць хрысціян. Што гэта значыць насамрэч?

Экуменізм (ад грэч. oikoumene — увесь населены свет) – гэта садзейнічанне аднаўленню еднасці ўсіх хрысціянаў. Езус Хрыстус заснаваў адзіны Касцёл і маліўся, «каб усе былі адно, як Ты, Ойча, ува Мне, і Я ў Табе, каб і яны былі ў Нас» (Ян 17, 21).

Другі Ватыканскі Сабор прапануе падобнае вызначэнне ў сваім Дэкрэце пра экуменізм Unitatis redintegratio: “Гэтая ласка ўзрушвае многіх людзей ва ўсім свеце. Таксама пад натхненнем ласкі Духа Святога сярод нашых адлучаных братоў узнік i з кожным днём штораз больш распаўсюджваецца рух аднаўлення еднасці ўсіх хрысціянаў. У гэтым руху да еднасці, які называецца экуменічным, удзельнічаюць тыя, хто заклікае Адзінага ў Тройцы Бога, a Езуса вызнае Панам i Збаўцам, пры гэтым не толькі паасобку, але ў складзе супольнасцяў, у якіх яны пачулі Евангелле i якія кожны з іх называе сваім i Божым Касцёлам. Аднак амаль усе яны, хоць і па-рознаму, імкнуцца да адзінага i бачнага Божага Касцёла, які быў бы сапраўды паўсюдным, пасланым да ўсяго свету, каб свет звярнуўся да Евангелля i праз гэта атрымаў збаўленне дзеля Божай хвалы”.

Акрамя таго, гэтае слова часта асацыюецца з экуменічнымі рухамі, якія таксама згадваюцца ў дакуменце: «Экуменічны рух — гэта дзейнасць і ініцыятывы, якія ўзнікаюць у залежнасці ад розных патрэб Касцёла i магчымасцяў дадзенай эпохі і імкнуцца садзейнічаць еднасці хрысціянаў».

Касцёл працягвае ісці гэтым шляхам і імкнецца «каб усе былі адно», як гэтага хацеў Хрыстус.

Па матэрыялах Credo
Пераклад Марыны Сінкевіч