Папа Францішак анансаваў выйсце другой часткі Laudato si’

На заканчэнне агульнай аўдыенцыі, якая прайшла 30 жніўня 2023 года, Святы Айцец абвясціў, што 4 кастрычніка 2023 года плануе абнародаваць адгартацыю на экалагічную тэматыку.

“Паслязаўтра, 1 верасня, будзе адзначацца Сусветны дзень малітвы аб ахове стварэння, які дасць пачатак Часу для стварэння, што будзе працягвацца да 4 кастрычніка, свята святога Францішка Асізскага”, — сказаў Папа, падкрэсліваючы, што ў гэты дзень ён мае намер абнародаваць адгартацыю, якая стане “другой Laudato si’“.

Пантыфік заклікаў вернікаў злучыцца з хрысціянам іншых канфесій у клопаце пра прыроду, разумеючы яе як дар Стварыцеля. “Неабходна стаць на бок ахвяр экалагічнай і кліматычнай несправядлівасці, намагаючыся пакласці канец бессэнсоўнай вайне супраць нашага супольнага дома, якая з’яўляецца жудаснай сусветнай вайной. Заклікаю ўсіх вас працаваць і маліцца, каб ён зноў быў напоўнены жыццём“, — сказаў Святы Айцец.

Напрыканцы аўдыенцыі, Папа Францішак скіраваў свае думкі да ўкраінскага народа. “Прашу вас, давайце адновім нашу блізкасць і нашу малітву за дарагую і змучаную Украіну, якая перажывае цяжкія пакуты”, — сказаў Папа.

Аляксандр Панчанка – беларуская рэдакцыя Vatican News