Папа да біскупаў з місійных тэрыторый пра сінадальную мадэль

На працягу апошніх двух тыдняў у Ватыкане праходзіў курс для біскупаў з місійных тэрыторый. Ён завяршыўся сустрэчай з Пантыфікам.

Ватыканскі трэнінг — гэта “як майстэрня для біскупаў з усяго свету, дзе кожны можа падзяліцца сваім унікальным вопытам”, — заўважыў нігерыйскі іерарх Фрэнсіс Абафемі Адэсіна. Ён дадаў, што сустрэча стала магчымасцю навучыцца супрацоўнічаць з дыкастэрыямі Святога Пасаду і глыбей паглядзець на апошнія папскія дакументы. Галоўнай тэмай стала евангелізацыя.

“Мы задаваліся пытаннем, як можна выкарыстоўваць сінадальную мадэль, як не пакінуць нікога без увагі, асабліва бедных”, — падзяліўся нігерыйскі іерарх. Уздымалася таксама тэма клопату аб прадстаўніках кансэкраванага жыцця. “Больш за ўсё мяне кранула тое, што наша навучанне было сустрэчай супрацоўнікаў у місіі Хрыста”, — прызнаўся біскуп Абафемі.

Святы Айцец звярнуў увагу на чатыры рэчы, якія патрабуюць увагі новых іерархаў. Па-першае, біскуп павінен быць чалавекам малітвы. Менавіта з малітвы выцякае яго місія. Па-другое, трэба клапаціцца пра братоў-біскупаў, мець час для іх і падтрымліваць адно аднаго. Трэцяе, на што ўказаў Папа, гэта неабходнасць быць побач з святарамі – бліжэйшымі супрацоўнікамі біскупаў. Без іх цяжка дасягнуць чагосьці ў душпастырскай сферы, асабліва калі гаворка ідзе пра першую евангелізацыю. Па-чацвёртае, Папа Францішак згадаў пра неабходнасць добрага кантакту з свецкімі вернікамі. У іх ёсць свая роля. Яны маюць сваю харызму ў Касцёле.

“Гэта двухтыднёвая праграма выклікала ў мяне і ў іншых біскупаў новы энтузіязм і новае бачанне”, — паведаміў нігерыйскі іерарх.

Аляксандр Амяльчэня — беларуская рэдакцыя Vatican News

для друку для друку