Пантыфіку ўручылі абноўлены Рымскі імшал на італьянскай мове

28 жніўня 2020 г. Папа прыняў на аўдыенцыі прадстаўнікоў Канферэнцыі Біскупаў Італіі, якія прымалі ўдзел у стварэнні новага выдання Рымскага імшала на італьянскай мове.

Дэлегацыю ўзначаліў старшыня епіскапату Італіі, кардынал Гуалцьера Басэці. Францішак атрымаў першы экзэмпляр новага Імшала і падзякаваў іерархам за дар і зробленую працу. Яна сведчыць аб паслядоўнасці ў рэалізацыі ўказанняў Другога Ватыканскага Сабора, — зазначыў Святы Айцец.

У Імшале ўтрымліваюцца некаторыя змены і дапаўненні. Сярод самых вядомых – новая версія перакладу малітвы “Ойча наш”, дзе замест слоў “не ўводзь нас у спакусу” гучыць: “не пакідай нас у спакусе”. Змены ў тэкстах былі зроблены ў адпаведнасці з перакладам Святога Пісання з 2008 г., які ўжо выкарыстоўваецца ў лекцыянарыі.

Новае выданне Пантыфік ухваліў яшчэ 16 мая 2019 г. пасля зацвярджэння Кангрэгацыяй Божага Культу і Дысцыпліны Сакрамэнтаў. У цяперашні момант можна карыстацца як абноўленай, так і папярэдняй версіямі. Абавязковым для ўжытку ў дыяцэзіях Італіі новы Імшал стане з наступнага Вялікадня, 4 красавіка 2021 г.

Беларуская рэдакцыя Vatican News

для друку для друку