Мацярынская трывожнасць: калі час звяртацца па дапамогу

Ілюстрацыйнае фота

Пахвалёны Езус Хрыстус! Вітаю ўсіх мамаў у нашай рубрыцы. Мінулы раз мы разглядалі прычыны мацярынскай трывожнасці. Сёння абмяркуем тыя выпадкі, калі мама не можа справіцца без дапамогі спецыялістаў.

  1. Парушэнне сну

Гаворка ідзе не проста пра моманты недасыпання праз дамашнія справы, начныя кармленні і да т.п. Нервовая сістэма, якая працуе ў рэжыме пастаяннага напружвання, пачынае блакаваць здольнасць арганізма адпачываць.

Моманты, на якія варта звярнуць увагу: вы не можаце заснуць і лежыце па некалькі гадзін нават ва ўмовах начной цемры, цішыні і супакою; адсутнічае «глыбокая фаза» сну: нават заснуўшы, вы чуеце кожны рух, гук, шоргат.

Хранічнае недасыпанне можа стаць прычынай развіцця панічных атак і дэпрэсіі.

  1. Гіперкантроль

Любая мама, канешне ж, клапоціцца пра здароўе і бяспеку дзіцяці. Але варта прыслухацца да сябе, ці не з’яўляюцца думкі кшталту: “Калі я кантралюю кожную секунду, з маім дзіцем нічога дрэннага не здарыцца. Як толькі я адвярнуся, адбудзецца катастрофа”.

Моманты, на якія варта звярнуць увагу: пастаянны кантроль, каторы знясільвае фізічна і маральна не толькі маму, але і людзей, што знаходзяцца побач з ёй; няздольнасць спакойна дэлегаваць абавязкі па выхаванні і доглядзе дзіцяці іншым, нават самым блізкім людзям; трывога і жаданне кантролю становіцца большымі за элементарныя жыццёвыя патрэбы: памыцца, паесці, пабыць у цішыні і г.д.

  1. Фізічны стан

Калі мама доўгі час знаходзіцца ў напружанні, увесь арганізм прыходзіць у «баявую гатоўнасць». Нервовая сістэма падае мозгу знакі пастаяннай небяспекі, і гэта прыводзіць да збою працы жыццёва важных органаў.

Моманты, на якія варта звярнуць увагу: тахікардыя, частыя галаўныя болі, пачуццё недахопу паветра.

  1. Жаданне сацыяльнай ізаляцыі

Адзін з самых трывожных момантаў – жаданне мамы закрыцца ад навакольнага свету і пазбягаць стасункаў з іншымі людзьмі. Часта гэта азначае, што жанчына зусім знясіленая і не мае рэсурсу. Усе сілы ідуць на падтрыманне свайго жыцця і клопат пра дзіця. Таму рэчы, якія раней прыносілі радасць і задавальненне, цалкам трацяць сэнс.

Важна ведаць, што, калі мама знаходзіцца ў стане цяжкага псіхалагічнага крызісу і закрываецца ад свету, звярнуцца па кваліфікаваную дапамогу можна бясплатна, ананімна і кругласутачна.

133 – кароткі нумар экстраннай псіхалагічнай дапамогі ў Беларусі. Званок бясплатны з любых мабільных і стацыянарных тэлефонаў.

Каб атрымаць накіраванне на псіхалагічную дапамогу, можна звяртацца ў медыцынскія ўстановы па месцы жыхарства, а таксама да прыватных спецыялістаў.

Галоўнае – своечасова адчуць і не занядбоўваць свае трывожныя станы, не застацца з імі сам-насам.

Падрыхтавала Вікторыя Філіпенка – мама дваіх дзяцей

для друку для друку