У Рыме беларускія грэка-католікі маліліся за Беларусь разам з кардыналам Конрадам Краеўскім

30 ліпеня асаблівай малітвай за Беларусь у Рыме завяршылася духоўная праграма «Святло Усходу», якая была для грэка-католікаў пэўнай нагодай ушанаваць 100-годдзе з дня нараджэння святога Яна Паўла ІІ.

Духоўная праграма вернікаў Беларускай Грэка-Каталіцкай Царквы распачалася з 26-й пілігрымкі Віцебск – Полацк 2020, якая праходзіла з 8 па 12 ліпеня пад дэвізам «Святло Усходу» на ўшанаванне 100-гадовага юбілею св. Яна Паўла ІІ.

Праграма «Святло Усходу» ахапіла таксама хрысціянаў у розных гарадах Еўропы: 19 ліпеня — у Бары (Італія), 26 ліпеня — у Варшаве, 30 ліпеня — у Рыме.

Гэта былі дні асаблівай малітвы за Беларусь.

На заканчэнне адмысловай духоўнай праграмы адбылася Эўхарыстыя ў базыліцы святога Пятра ў Рыме на магіле святога Яна Паўла ІІ, у якой удзельнічыла таксама група хрысціянаў з Беларусі разам з іхнімі сябрамі з Італіі, Польшчы і Расіі.

Напрыканцы святой Імшы папскі элемазінарый кардынал Конрад Краеўскі, адказны за дабрачынную дзейнасць Папы Францішка, асвяціў абраз св. Яна Паўла ІІ, напісаны па просьбе валанцёраў грэка-каталіцкай пілігрымкі Віцебск – Полацк.

Па матэрыялах Svjazep.org