У Смаргоні павялічыліся шэрагі міністрантаў і чальцоў «Савіо-клуба»

14 мая Cалезіянская сям’я Смаргоні адзначыла свята св. Дамініка Савіо, выхаванца ксяндза Боска. Гэтага святога юнака з араторыя на Вальдокка часта называюць маленькім гігантам духа, таму што ён у маладым узросце дасягнуў значную ступень духоўнага жыцця і ўжо пры жыцці яго называлi святым. Дамінік Савіо з’яўляецца апекуном міністрантаў, моладзі і цяжарных жанчын.

Вернікі салезіянскай парафіі св. Міхала Арханёла ў Смаргонi ўшанавалі гэтага святога падчас нядзельнай святой Імшы. Асаблівым момантам Літургіі было прыняцце 14 хлопцаў у міністранты. Кс. Артур Ляшнеўскі SDB, які суправаджаў юнакоў падчас фармацыйнай падрыхтоўкі да гэтага моманту, урачыста апрануў кожнаму комжу і благаславіў на плённае служэнне. Кандыдаты выказалі перад сабранымі сваё жаданне служыць Богу і парафіі і склалі міністранцкія абяцанні.

Пасля гэтага адбылося прыняцце 21 новага члена клуба св. Дамініка Савіо. Моладзь старэйшай групы аднавіла пастанаўленні, зробленыя ў мінулым годзе, дзеці з малодшай групы прысягнулі ўпершыню. Абяцанні жыць у сяброўстве з Езусам і Марыяй, сумленна выконваць свае абавязкі, пазбягаць цяжкага граху выканаць зусім не проста. Але хлопцы і дзяўчаты ўпэўнены ў сур’ёзнасці сваіх намераў і ў тым, што з радасцю дапамогуць адзін аднаму дайсці да святасці па прыкладу свайго нябеснага заступніка. Члены “Савіо-клуба” стараюцца ў сваім жыцці наследаваць прыклад св. Дамініка, будуючы сваё жыццё згодна з рэцэптам святасці: радасць, дабразычлівасць i сумленнае выкананне сваіх абавязкаў.

Пасля супольнай Эўхарыстыі вернікі накіраваліся на Савіо-фэст пры палявым алтары, дзе ўсіх чакаў вялікі сюрпрыз. Дзеці і іх бацькі маглі пазнаёміцца з рознымі святымі — Дамiнiкам Савіо, Стэфанам Шандорам, Лаўрай Вікуньяй і Альбертам Марвэлі. Дзеці ўдзельнічалі ў гульнях, танцах і супольных забавах.

Вераніка Рогач, ASC

 для друку