Каталіцкі Веснік Добрая Вестка ў тваім доме!
Ілюстрацыйнае фота
Нядаўнія даследаванні паказваюць, што маладзейшыя пакаленні амерыканцаў, асабліва пакаленне Z, часцей удзельнічаюць у набажэнствах, і іх рэлігійнае жыццё перажывае нечаканыя змены. Дадзеныя паказваюць, што пакаленне Z (людзі ва ўзросце 18-28 гадоў) і міленіялы (людзі, якія нарадзіліся з 1981 па 1996 гады) лідзіруюць па наведвальнасці касцёла, пераўзыходзячы сваіх бацькоў, бабуль і дзядуль.
Даследаванне Barna Group
Даследаванне, праведзенае Barna Group у партнёрстве з Gloo, паказала, што прадстаўнік пакалення Z удзельнічае ў набажэнствах у сярэднім 1,9 разы ў месяц, што складае прыблізна 23 наведванні ў год. Міленіялы (ва ўзросце 29-44 гадоў) удзельнічаюць у набажэнствах крыху радзей, у сярэднім 1,8 разы ў месяц. Гэта самы высокі ўзровень наведвальнасці для маладзейшага пакалення з моманту пачатку маніторынгу Barna Group.
Для параўнання, бэбі-бумеры (людзі, якія нарадзіліся паміж 1947 і 1964 гадамі) наведваюць касцёл 1,4 разы ў месяц, у той час як пакаленне X (людзі, якія нарадзіліся з 1964 па 1980 год, у іншых крыніцах — з 1965 па 1979 г.) наведвае касцёл крыху часцей — 1,6 разы. У апытанні прынялі ўдзел 5580 рэспандэнтаў, яно праводзілася ў перыяд са студзеня па ліпень 2025 года.
На думку экспертаў, змяненне папярэдніх тэндэнцый, калі старэйшыя пакаленні былі найбольш рэлігійна актыўнымі, азначае новы этап у духоўным жыцці амерыканцаў. Дэніэл Коўпленд, віцэ-прэзідэнт па даследаваннях Barna Group, падкрэслівае, што рост цікавасці сярод моладзі не з’яўляецца чымсьці відавочным і з’яўляецца пазітыўным пасланнем для рэлігійных супольнасцей, што сведчыць пра духоўнае адраджэнне маладзейшых пакаленняў.
Пандэмія COVID-19, якая паўплывала на дзейнасць многіх касцёлаў, вымусіла да адаптацыі шляхам увядзення гібрыдных і лічбавых формаў набажэнстваў.
Павелічэнне наведвальнасці моладзі таксама можа быць звязана з аднаўленнем пошуку сэнсу, супольнасці і адказаў на экзістэнцыяльныя пытанні пасля перажывання глабальнага крызісу ў галіне аховы здароўя.
Сацыякультурны кантэкст
Нягледзячы на рост наведвальнасці касцёла, даследаванні паказваюць, што працэнт пакалення Z, якое ідэнтыфікуе сябе як хрысціян, усё яшчэ ніжэйшы, чым у старэйшых пакаленняў (каля 45%), і многія маладыя людзі ідэнтыфікуюць сябе як «адухоўленыя», а не звязаныя з інстытуцыйнай рэлігіяй. Некаторыя эксперты тлумачаць гэта зменай у тым, як маладыя людзі выбіраюць сваю дзейнасць.
Нядаўнія даследаванні паказваюць цікавую тэндэнцыю: рэлігійнасць расце ў асноўным сярод мужчын пакалення Z, у той час як маладыя жанчыны ўсё часцей дэманструюць нерэлігійныя погляды. У Злучаных Штатах да 40% жанчын гэтага пакалення ідэнтыфікуюць сябе як нерэлігійныя, у параўнанні толькі з 34% мужчын.
Гэта адрозненне адлюстроўвае больш глыбокія сацыяльныя і культурныя змены, калі маладыя жанчыны часта ацэньваюць рэлігію праз прызму такіх пытанняў, як гендэрная роўнасць, стаўленне Касцёла да ЛГБТ+ і скандалы са злоўжываннямі.
Мужчыны становяцца рэлігійнымі.
Маладыя мужчыны таксама часцей за жанчын больш удзельнічаюць у касцёльным жыцці і дэманструюць больш моцную прыхільнасць да традыцыйных формаў веры. Расце колькасць рэлігійных суполак і ініцыятыў, спецыяльна накіраваных на мужчын, што падкрэслівае каштоўнасць ахвярнасці і ўдзелу мужчын у жыцці Касцёла.
У Польшчы таксама назіраецца рост наведвальнасці мужчынамі штодзённай Імшы, асабліва раніцай, а таксама актыўнасці ў такіх групах, як Рыцары Калумба і Мужчыны Святога Юзафа.
Гэтая з’ява часта інтэрпрэтуецца як рэакцыя маладых мужчын на культуру, у якой дамінуюць фемінізм і ідэалогіі, якія, на іх думку, маргіналізуюць іх ролю. Касцёл, як інстытут, які не ставіцца да іх скептычна, можа даць ім прастору для пошуку ідэнтычнасці і духоўнай супольнасці.
pl.aleteia.org
Пераклад Марыны Ткач
для друку
