Каталіцкі Веснік Добрая Вестка ў тваім доме!
Праваабарончая група, якая працуе ў Кітаі, паведамляе, што вернікі густанаселенай кітайскай правінцыі цяпер павінны рэгістравацца ў дзяржаўным дадатку, каб наведваць набажэнствы.
Амерыканская хрысціянская дабрачынная арганізацыя «ChinaAid» паведаміла, што рэлігійны Дэпартамент урада правінцыі Хэнань разгортвае сістэму, згодна з якой усе вернікі павінны рабіць анлайн браніраванне, перш чым наведваць службы ў цэрквах, мячэцях або будысцкіх храмах, піша CNA.
Браніраванне ажыццяўляецца праз дадатак «Smart Religion», распрацаваны камісіяй па этнічных і рэлігійных справах правінцыі Хэнань. Кандыдаты павінны запоўніць асабістую інфармацыю: імя, нумар тэлефона, дзяржаўны ідэнтыфікацыйны нумар, пастаяннае месца жыхарства, род дзейнасці і дату нараджэння — перш чым яны змогуць зрабіць браніраванне. Тыя, каму дазволена наведваць месца адпраўлення культу, таксама павінны вымераць тэмпературу (гэта азначае, што дадатак можа быць нейкім чынам звязаны з абмежаваннямі COVID-19) і паказаць код браніравання.
Паводле ўрадавага апытання 2012 года, правінцыя Хэнань, размешчаная ва ўсходне-цэнтральнай частцы краіны, мае адну з найбуйнейшых хрысціянскіх груп насельніцтва ў Кітаі — да 6%.
Камуністычны ўрад Кітая афіцыйна з’яўляецца свецкім, і тое ж даследаванне паказала, што толькі 13% з 98 мільёнаў жыхароў Хэнань належаць да арганізаванай рэлігіі.
ChinaAid заявіла, што распрацоўка і рэалізацыя праграмы былі часткай намаганняў камуністычнага ўрада па «строгаму і ўсебаковаму кантролю над рэлігіяй», у тым ліку шляхам збору даных аб верніках. Група таксама выказала занепакоенасць тым, што ўвядзенне гэтага дадатковага бар’ера пазбавіць людзей жадання вызнаваць сваю рэлігію.
CREDO
пераклад Марыны Ткач
для друку
