Каталіцкі Веснік Добрая Вестка ў тваім доме!
Ватыканскі трыбунал. Ілюстрацыйнае фота
Распачаў працу Нацыянальны кананічны крымінальны суд Канферэнцыі Біскупаў Францыі. Гэта ўнутраная касцёльная структура, якая разглядае кананічныя злачынствы, учыненыя духавенствам або свецкімі асобамі.
Суд замяніў сабой – выключна ў крымінальных справах – усе існуючыя дыяцэзіяльныя і міждыяцэзіяльныя суды ў Францыі. Яго юрысдыкцыя распаўсюджваецца на ўсю тэрыторыю краіны.
Рашэнне аб стварэнні трыбунала было прынята мясцовым епіскапатам на пленарнай асамблеі ў сакавіку 2021 года. Акрамя суддзяў з шэрагаў духавенства, ён будзе ўкамплектаваны адпаведным чынам падрыхтаванымі свецкімі супрацоўнікамі са ступенню доктара ці ліцэнцыята кананічнага права. Іх будзе прызначаць Пастаянная рада Канферэнцыі Біскупаў Францыі.
Гэта першы трыбунал такога тыпу ў свеце, бо ніводная іншая біскупская канферэнцыя не заснавала суд у такой форме і з такімі кампетэнцыямі.
Пасяджэнні будуць праходзіць у закрытым фармаце. Пакаранні, якія суд можа накласці ў адпаведнасці з кананічным правам, уключаюць: адхіленне ад пасады, забарону (або загад) заставацца ў дадзеным месцы, забарону выконваць святарскія функцыі, экскамуніку, перавод у свецкі стан, штраф або кампенсацыю.
Рашэнні трыбунала могуць быць абскарджаны ў Апостальскай Сталіцы.
кс. Аляксандр Амяльчэня, беларуская рэдакцыя Vatican News
для друку
