У 2022 годзе Caritas дапамагла больш, чым калі-небудзь раней

Паводле прадстаўленага балансу за 2022 год, Caritas Internationalis аказала дапамогу 9,8 мільёнам чалавек у 77 краінах свету. Яна выдаткавала рэкордную суму ў 119 мільёнаў еўра ў 639 праектах дапамогі – на 25 мільёнаў еўра больш, чым у 2021 годзе.

Адной з галоўных задач сусветнай каталіцкай дабрачыннай арганізацыі была падтрымка больш чым трох мільёнаў чалавек, якія пацярпелі ад вайны Расіі супраць Украіны. Там задзейнічана 2700 супрацоўнікаў у 44 абласных цэнтрах і 180 прытулках.

Падчас прэзентацыі штогадовай справаздачы ў Фрайбургу дырэктар Caritas Internationalis Олівер Мюлер звярнуў увагу на тое, што акрамя вайны ва Украіне, па ўсім свеце ідзе яшчэ 216 узброеных канфліктаў. Вайна ў цэнтры Еўропы значна затрымала барацьбу з голадам у свеце, асабліва з прычыны спынення экспарту збожжа і ўгнаенняў. Ва ўсім свеце галадаюць 783 мільёна чалавек.

Caritas Internationalis аб’ядноўвае 162 нацыянальныя арганізацыі, якія працуюць у больш чым 200 краінах. Рэзідэнцыя асацыяцыі знаходзіцца ў Ватыкане. Яна падпарадкоўваецца ватыканскай Дыкастэрыі па служэнні інтэгральнаму развіццю чалавека, якую ўзначальвае кардынал Майкл Чэрны, канадскі езуіт чэшскага паходжання.

Кс. Аляксандр Амяльчэня, беларуская рэдакцыя Vatican News