Папа Францішак аднаўляецца пасля хірургічнай аперацыі

Святы Айцец правёў яшчэ адну спакойную ноч у клініцы імя Агасціна Джэмэлі. Стан яго здароўя паляпшаецца, ён чытае газеты і пачынае працаваць, — паведаміла 9 чэрвеня 2023 года Зала Друку Апостальскай Сталіцы.

“Папа Францішак добра адпачыў на працягу ночы. Медыкі паведамляюць, што клінічная карціна пастаянна паляпшаецца, а пасляаперацыйнае аднаўленне ідзе належным чынам”, — гаворыцца ў паведамленні кіраўніка Залы Друку Апостальскай Сталіцы Матэа Бруні, распаўсюджаным 9 чэрвеня 2023 года.

Пасля сняданку Святы Айцец пачаў рухацца, правёўшы большую частку раніцы ў фатэлі. Гэта дало яму магчымасць праглядзець газеты і пачаць працаваць, — паінфармаваў Матэа Бруні.

Нагадаем, што 7 чэрвеня Папу Францішку была зроблена лапаратамія і пластыка брушной сценкі пратэзамі ў клініцы імя Агасціна Джэмэлі. Пасля хірургічнага ўмяшальніцтва Святы Айцец атрымаў шматлікія пажаданні хутчэйшага выздараўлення, за якія ён падзякаваў, просячы працягваць маліцца аб ім.

Па матэрыялах беларускай рэдакцыі Vatican News