Бацькоўскія правы перамаглі: важны вердыкт Вярхоўнага cуда ЗША

Біскуп Кевін Роадс, старшыня Камісіі па рэлігійнай свабодзе епіскапату ЗША, вітаў рашэнне Вярхоўнага суда, якое абараняе правы бацькоў.

«Бацькі маюць права кіраваць выхаваннем сваіх дзяцей, асабліва ў пытаннях, якія датычацца веры і маральнасці», — заявіў біскуп Роадс.

Іерарх пракаментаваў пастанову Вярхоўнага Суда ў справе «Махмуд супраць Тэйлар», якая прызнала бацькам права вызваляць дзяцей ад удзелу ў школьных праграмах, супярэчных іх рэлігійным каштоўнасцям. Справа датычылася «інклюзіўных» тэкстаў, уведзеных у праграму дзяржаўных школ акругі Мантгомеры, змест якіх быў засяроджаны на пытаннях сексуальнасці і гендару.

«Дзяржаўныя школы прымаюць сем’і з рознымі глыбокімі перакананнямі. Закранаючы складаныя пытанні, яны павінны паважаць усе сем’і», — падкрэсліў біскуп. «Бацькі не губляюць права быць першымі выхавацелямі сваіх дзяцей толькі таму, што запісваюць іх у дзяржаўную школу».

«Відавочна, што дзецям не варта ўнушаць думку, нібыта іх полавая прыналежнасць можа быць адарвана ад фізічнага цела. Калі ж школа ўсё ж уводзіць такія праграмы, яна мусіць паважаць права тых сем’яў, якія не жадаюць, каб іх дзеці ў гэтым удзельнічалі», – падкрэсліў біскуп, які адказвае за пытанні рэлігійнай свабоды.

кс. Аляксандр Амяльчэня, беларуская рэдакцыя Vatican News