Папа Францішак чакае зручнага моманту для візіту ва Украіну

“Я хацеў бы паехаць ва Украіну, але хачу дачакацца зручнага моманту”, — прызнаўся Папа ў суботу, 4 чэрвеня 2022 года, адказваючы на пытанне ўкраінскага дзіцяці падчас мерапрыемства ў рамках Дзіцячага панадворка.

Папа Францішак прыняў групу каля 160 дзяцей – выхаванцаў цэнтра для слабавідушчых Sant’Alessio — Margherita di Savoia. Да іх далучыліся дзеці-бежанцы з Украіны, якія знайшлі прытулак у рымскай грэка-каталіцкай парафіі святой Сафіі. Сустрэча праходзіла ва ўнутраным дворыку Апостальскага палаца. Святы Айцец паведаміў, што неўзабаве правядзе размовы з украінскімі ўладамі на тэму магчымасці візіту.

Дзіцячы панадворак вярнуўся ў Ватыкан пасля двухгадовага перапынку. У яго рамках Святы Айцец прымае дзяцей, што знаходзяцца ў асабліва цяжкай сацыяльнай сітуацыі. Ініцыятыва – не проста аднаразовае мерапрыемства, а педагагічнае і асветніцкае падарожжа, якое працягваецца ўвесь год. Яна з’яўляецца часткай больш шырокага праекта Панадворак язычнікаў – цыкла сустрэч, накіраваных на дыялог паміж вернікамі і няверуючымі, а таксама на садзейнічанне інтэграцыі, сацыяльнай інклюзіі і барацьбу з дыскрымінацыяй і прадузятасцю. Каардынацыяй займаецца Папская рада па культуры.

Пасля сустрэчы ў сваім Твітары Папа Францішак напісаў: “Давайце разам памолімся за дзяцей-сірот і дзяцей, якія вымушаны ўцякаць ад вайны, якія пакутуюць ад голаду, адсутнасці клопату, злоўжыванняў і насілля ва ўсім свеце. Памолімся за тых, каму адмоўлена ў праве на нараджэнне. Абаронім дзяцей!».

Кс. Аляксандр Амяльчэня, беларуская рэдакцыя Vatican News