6 снежня: першы тыдзень Адвэнту

У той час:

Калі Езус адыходзіў адтуль, ішлі за Ім двое сляпых, якія крычалі: Змілуйся над намі, Сыне Давіда!

І калі Ён прыйшоў у дом, сляпыя падышлі да Яго. І кажа ім Езус: Ці верыце, што Я магу зрабіць гэта?

Яны кажуць Яму: Так, Пане!

Тады Ён дакрануўся да вачэй іхніх і сказаў: Няхай станецца вам паводле веры вашай.

І адкрыліся іх вочы. І Езус сурова наказаў ім: Глядзіце, каб ніхто не даведаўся. А яны, калі выйшлі, абвясцілі пра Яго па ўсёй той зямлі (Мц 9, 27–31).

Адвэнт толькі-толькі распачаўся, да Новага года яшчэ амаль месяц, а ў дзверы нашых сэрцаў і нашых касцёлаў ужо стукаецца святы Мікалай. 6 снежня незвычайны дзень, асабліва для дзяцей, якія выраслі ў каталіцкай традыцыі постсавецкага часу. Святы біскуп Мікалай, а не міфічны Дзед Мароз, усё часцей і часцей завітвае ў дамы і парафіі беларусаў, прыносячы падарункі і дорачы радасць перажывання зімовых святаў Божага Нараджэння. Прыемна адзначаць, што нашыя вернікі пакрысе вяртаюцца да сваіх каранёў, усведамляючы важнасць сваёй каталіцкай ідэнтычнасці.

Святы Мікалай, біскуп Міры

“Няхай станецца вам паводле вашай веры”, — кажа Хрыстус сляпым  у сённяшнім урыўку з Евангелля ад Мацвея. Вера адкрывае чалавеку вочы. Таму чалавеку, які гадамі, а можа нават дзесяцігоддзямі хадзіў у цемры бязвер’я. Чалавеку, які прызвычаіўся да ілжывай атэістычнай прапаганды, што Бога няма, святых няма, Божага Нараджэння няма і ніколі не было. А галоўным зімовым святам ёсць Новы год з Дзедам Марозам і Снягуркай.

Але святло Бэтлеемскай зоркі ўсё ярчэй зіхаціць над нашай Бацькаўшчынай, і сэрцы шматлікіх людзей асвятляюцца праўдай веры. Веры, якая робіць цуды, якая перамяняе жыццё на лепшае, якая асвятляе шлях да Хрыста. Бо “Пан – маё святло і маё збаўленне,” —  кажа нам сёння рэфрэн псальма. Толькі ў Богу чалавек можа знайсці праўдзівае шчасце. Адчуць сапраўдную радасць і супакой. Навучыцца любіць і прымаць любоў. Быць міласэрным і прасіць прабачэнне. Жыць так, як жылі святыя. Адным з якіх быў святы Мікалай, успамін ягога мы сёння і адзначаем.

Традыцыя распавядае, што калі святы Мікалай быў у Ерузалеме, то ноччу на Сіёнскай гары брамы касцёла самі адчыніліся перад вялікім пілігрымам. Няхай жа час Адвэнту будзе для кожнага з нас пілігрымкай веры, якая вядзе да святла праўды. А ў канцы гэтай пілігрымкі і перад намі адчыняцца брамы, што вядуць у ціхую радасць  сціплай бэтлеемскай стайні. Каб там “Сузіраць хараство Пана і наведваць Яго святыню”(Пс. 27(26),4).

Кс. Аляксандр Грыцкевіч