[1]«Гэта самая высокатэхналагічная выстава ў гісторыі. Самая відовішчная, калі гаворка ідзе пра змястоўнасць, але таксама і па маштабах выстава ў Еўропе.
У іммерсіўнай зале, дзякуючы 39 лазерным праектарам, ўпершыню ў гісторыі можна ўбачыць усю Сікстынскую капэлу, адлюстраваную ў маштабе 1 да 1, — кажа Барталомей Фелюш з выдавецтва Manuscriptum, якое з’яўляецца арганізатарам выставы «Сікстынская капэла. Спадчына», якая ў гэтыя дні праходзіць у Кракаве.
Выстава, прадстаўленая ў Кракаве, партнёрам і суарганізатарам якой з’яўляюцца музеі Ватыкана, стала вынікам фотакампаніі, мэтай якой было захаванне фрэсак у Сікстынскай капэле для будучых пакаленняў. За 65 начэй фатографы з Італіі зрабілі 270 тысяч здымкаў. Спачатку быў выпушчаны трохтомны альбом вагой 27 кілаграмаў і коштам 102 тысячы злотых. Гэта адзін з найбуйнейшых серыйных альбомаў, які выдаецца тыражом 1999 асобнікаў. Альбом можна пабачыць на выставе ў Кракаве.
Падчас пандэміі, калі не было турыстычнага руху, было вырашана выкарыстаць гэтую фотасесію для стварэння мультымедыйнай выставы.
Сама выстава складаецца з трох частак.
Першая — носіць адукацыйны характар. Наведвальнікаў чакае фільм пра паходжанне фотасесіі і мноства цікавых фактаў пра работы, знойдзеныя ў Сікстынскай капэле і іх стваральніках. Таксама можна ўбачыць копіі дзвюх знакамітых скульптур Мікеланджэла — П’еты з сабора Святога Пятра і Давіда з Фларэнцыі.
[2]
У другім павільёне знаходзіцца кіназала з самым вялікім у Еўропе святлодыёдным экранам, які выкарыстоўваецца на выставах. Ён мае 20 метраў у даўжыню, 4 метры ў вышыню, 12 мільёнаў дыёдаў. На ім дэманструецца мастацкі фільм пра ўзнікненне капэлы.
Сэрцам выставы з’яўляецца іммерсіўная зала, у якой можна ўбачыць праекцыю Сікстынскай капэлы — яна мае памеры 14 на 40 метраў, як і храм іерусалімскага цара Саламона, па абрысах якога была пабудавана Сікстынская капэла. Ватыканская капліца мае вышыню больш за 21 метр, на выставе карціны дэманструюцца на вышыні 7 метраў, але, як запэўніваюць яе стваральнікі, гэта таксама перавага, таму што многія дэталі можна ўбачыць з значна меншай адлегласці. Сцены экспазіцыі маюць памеры, ідэнтычныя памерах Сікстынскай капэлы, а столь паўкруглы, таму 39 лазерных праектараў дазваляюць цалкам прайграць ватыканскі арыгінал.
[3]
«Мы хочам уразіць людзей не толькі тэхнікай, мы хочам паўплываць на іх не толькі вобразамі. Мы хочам даць ім веды, — падкрэслівае Барталомей Фелюш.
Выстава «Сікстынская капэла. Спадчына» будзе дзейнічаць да 30 верасня.
Паводле Vatican News [4]
пераклад Марыны Ткач