[1]Рэстаўрацыя ўбранняў святых Пятра і Яна
Туніка і далматыка копцка-егіпецкай вытворчасці, датаваныя першымі стагоддзямі хрысціянства і шанаваныя як адзенне святых апосталаў Пятра і Яна, будуць выстаўлены ў Ватыканскіх музеях.
23 мая 2024 года ў рамках ініцыятывы Музейны чацвер адбудзецца прэзентацыя пад назвай Убранне святых Пятра і Яна – дзве надзвычайныя рэліквіі Sancta Sanctorum. Падчас яе эксперты прадставяць шырокай публіцы старажытныя туніку і далматыку, якія традыцыя і народная пабожнасць прыпісваюць святым апосталам.
Рэліквіі будуць экспанавацца некаторы час у Зале зваротаў Пія ІХ пры выйсці з Сікстынскай капэлы, дзе выстаўлены самыя каштоўныя экспанаты з Папскай капэлы Sancta Sanctorum – скарбніцы базілікі святога Яна на Латэране, якая размяшчаецца ў верхняй частцы санктуарыя Святой Лесвіцы.
Прэзентацыя адбудзецца па выніках рэстаўрацыі гэтых каштоўных экспанатаў, якая праводзілася з 2019 па 2024 год у Майстэрні габеленаў і тканін Ватыканскіх музеяў. Навуковыя даследаванні, праведзеныя ў рамках рэстаўрацыйных прац, дазволілі атрымаць новую інфармацыю аб паходжанні і гісторыі гэтых тэкстыльных вырабаў.
[2]
[3]
Убранні былі вытканы копцка-егіпецкімі майстрамі. Туніка, якую традыцыя прыпісвае святому Пятру, адносіцца да другой паловы VI – першай паловы VII стагоддзя, а далматыка, якая ўшаноўвалася як адзенне святога Яна Евангеліста, датуецца канцом І – другой паловай ІІ стагоддзя.
[4]
Хоць гэта вопратка на самай справе не належала апосталам, але на працягу стагоддзяў карысталіся вялікай пашанай вернікаў. Пры ўважлівым разглядзе былі выяўлены разрэзы ўздоўж падолаў, якія нагадваюць пра шырока распаўсюджаную ў мінулым практыку выкарыстання невялікіх фрагментаў рэліквій для публічнага і прыватнага ўшанавання.
Аляксандр Панчанка, беларуская рэдакцыя [5] Vatican News