[1]У сераду 14 верасня, у свята Узвышэння Святога Крыжа, у касцёле святога Сымона і святой Алены ў Мінску (Чырвоны касцёл) адбудзецца сустрэча прадстаўнікоў розных рэлігій, паведамляе Catholic.by [2].
Сустрэча пройдзе пад дэвізам «Каштоўнасць міра і адзінства». Яна прымеркавана да VII Кангрэсу лідараў сусветных і традыцыйных рэлігій, які з удзелам Папы Францішка ў гэтыя дні будзе праходзіць у Казахстане. Касцёл на Беларусі на ім прадставяць кіраўнік беларускага каталіцкага епіскапату біскуп Віцебскі Алег Буткевіч і старшыня сінадальнай камісіі пры ККББ біскуп Аляксандр Яшэўскі SDB.
Пачатак сустрэчы ў Чырвоным касцёле ў 20.00.
Праграма сустрэчы:
- Урачысты ўваход удзельнікаў;
- Прывітальнае слова Мітрапаліта Мінска-Магілеўскага арцыбіскупа Юзафа Станеўскага;
- Даклад: «Эвард Вайніловіч — чалавек міра і адзінства», ксёндз канонік Уладзіслаў Завальнюк;
- Малітва праслаўлення (пераклад на беларускую мову з юдэйскага збора малітваў «Сідур»);
- Літургія слова;
- Першае чытанне з Першага Паслання святога апостала Паўла да Карынцянаў (1 Кар 13, 1–8);
- Чытанне з Евангелля паводле Мацвея (Мц 5, 13–16);
- Прамова і кароткая малітва прадстаўнікоў розных рэлігій;
- Заключныя малітвы.
Арганізатары сустрэчы шчыра запрашаюць усіх людзей добрай волі далучыцца да супольнай малітвы за мір ва ўсім свеце.