[1]З 27 па 29 сакавіка ў Міждыяцэзіяльнай вышэйшай духоўнай семінарыі ў Гродне прайшлі рэкалекцыі для юнакоў на тэму распазнання паклікання. Удзельнічала больш за 50 чалавек з розных дыяцэзій.
Паколькі рэкалекцыі адбыліся ў перыяд Вялікага посту, яны праходзілі пад назвай “Езус Хрыстус – мой Валадар, які насіў цярновы вянок”.
Праграма першага дня ўключала святую Імшу, якая цэлебравалася за мір у свеце, за Касцёл, аб навяртанні грэшнікаў, за сем’і ўдзельнікаў рэкалекцый і аб тым, каб Езус Хрыстус у сваёй міласэрнасці дазволіў ім распазнаць пакліканне. У гаміліі мадэратар прапедэўтычнага курса гродзенскай семінарыі закрануў тэму таго, кім павінен быць Езус для сучаснага хрысціяніна: адзіным Збаўцам, Сынам Божым і Чалавекам – адным з людзей, Галавой Касцёла, Валадаром чалавечага жыцця, Тым, з каго трэба браць прыклад.
Пасля адбылася адарацыя крыжа, на якой удзельнікі рэкалекцый разважалі над любоўю Езуса, прынесенай Ім ахвярай і прабачэннем, якім Ён адарыў людзей.
Другі дзень пачаўся малітвай Ютрані і разважаннем над Святым Пісаннем. Яшчэ адным пунктам праграмы рэкалекцый была катэхеза, якую правялі студэнты семінарыі, закрануўшы тэму таго, чым для хрысціяніна павінен быць Касцёл і як ісці дарогай святасці ў штодзённым жыцці. Для юнакоў з іншых дыяцэзій была праведзена экскурсія па горадзе Гродна і яго святынях.
Таксама адбылася малітва Вяночка да Божай Міласэрнасці ў інтэнцыях удзельнікаў рэкалекцый, за Касцёл на Беларусі, яго вернікаў і пастыраў. Потым юнакі мелі магчымасць паразмаўляць, згуляць у більярд і тэніс.
У той жа дзень з юнакамі сустрэўся біскуп Гродзенскі Уладзімір Гуляй, які паразмаўляў з імі пра пакліканне і адносіны з Хрыстом, падзякаваў за ўдзел у гэтых рэкалекцыях, а тым з іх, хто з’яўляецца міністрантамі, – за служэнне пры алтары. Маладыя людзі маглі задаць біскупу пытанні – яны датычыліся яго паклікання, дзяцінства, часу вучобы ў школе і семінарыі, музычных захапленняў і заснавання музычнага гурту “Ave”, які дзейнічае ў гродзенскай семінарыі. Быў зроблены супольны фотаздымак.
[2]
Вечарам юнакі ўдзельнічалі ў Імшы, якую цэлебраваў біскуп у гродзенскай катэдры, і Крыжовым шляху па вуліцах горада.
Нядзеля пачалася малітвай Ютрані і разважаннем над Божым словам, потым адбылася канферэнцыя “Як шанаваць ахвяру Хрыста ў штодзённым жыцці?”. Канферэнцыя давала ўдзельнікам рэкалекцый магчымасць зрабіць рахунак сумлення: у яе межах гучалі пытанні пра жаданне размаўляць з Хрыстом у малітве, сустракацца з Ім у Эўхарыстыі, перапрашаць за свае правіны ў споведзі, слухаць Яго ў Божым слове.
Галоўным пунктам праграмы рэкалекцый стала Імша ў катэдры, якую цэлебраваў біскуп Гродзенскі, звярнуўшыся з гаміліяй да вернікаў і сярод іх да юнакоў, якія ўдзельнічалі ў рэкалекцыях. Па словах маладых людзей, рэкалекцыі пакінулі ў іх добрыя ўражанні і далі шчодрую “духоўную ежу” для разважанняў.
Grodnensis.by [3]