[1]“На Беларусі ёсць месцы святыя. Адно з іх — у Будславе велічны храм”. Словамі гэтага спеву віталі Маці Божую Будслаўскую першага мая. Гэта вернікі з усёй Беларусі прыбылі ў Нацыянальны Санктуарый на сустрэчу касцёльных рухаў і супольнасцяў.
Цікава, што гісторыя гэтых спатканняў распачалася шмат год таму. Калі адна з супольнасцяў 1 мая, у выходны дзень, вырашыла прыехаць, каб разам памаліцца ў Будслаў. Яны запрасілі далучыцца да гэтай малітвы і ксяндза біскупа Юрыя Касабуцкага. На наступны год да ініцыятывы далучылася яшчэ некалькі рухаў, а потым яшчэ некалькі. Так малымі крокамі такое спатканне стала ўжо добрай традыцыяй.
У 2024 годзе сустрэча была прысвечана тэме «Касцёльныя рухі ў евангелізацыі Беларусі».
Пілігрымы збіраліся ў велічнай базыліцы і схілялі свае калені перад Божай Маці, Якая, трымаючы на руках Сына, пяшчотна пазірала на ўсіх сваіх дзяцей. Месяц май, дарэчы, у Каталіцкім Касцёле асабліва прысвечаны Багародзіцы.
Сабраных прывіталі генеральны вікарый Мінска-Магілёўскай архідыяцэзіі біскуп Юрый Касабуцкі разам з пробашчам Будслаўскай парафіі ксяндзом Дзмітрыем Дубовікам.
[2]
Распачалася прэзентацыя прысутных рухаў і супольнасцяў. Важныя моманты пра заснавальнікаў, харызму, асноўныя мэты, а таксама пра месцы служэння ў Беларусі расказалі наступныя прадстаўнікі:
- Асацыяцыя Святой Сям’і пры Кангрэгацыі сясцёр Найсвяцейшай Сям’і з Назарэта;
- Апостальства дапамогі душам чысцовым;
- рух сужэнскай духоўнасціEquipes Notre—Dame;
- «Легіён Марыі»;
- «Маці ў малітве»;
- рух «Новае аблічча парафіі»;
- «Нэакатэхуменальны шлях»;
- рух «Святло-жыццё» і яго адгалінаванні: сямейнае аб’яднанне «Хатні Касцёл» і Міжнародная дыяконія евангелізацыі і вызвалення «Каштоўная пярліна»;
- рух «Сужэнскія сустрэчы»;
- рух «У абарону жыцця»;
- рух Факаляраў;
- супольнасць «Фаўстынум»;
- Міжнародны Шанштацкі рух;
- Міжнародны каталіцкі харызматычна-евангелізацыйны рух Gloriosa Trinitas;
- Свецкі Ордэн кармэлітаў босых — супольнасць святога Юзафа;
- Францішканскі Ордэн свецкіх;
- «Рыцарства Беззаганнай»;
- «Ружанцовая эстафета — Круцыята малітвы — Сям’я сем’яў»;
- Браты і сёстры ад пакуты Трэцяга Францішканскага Ордэна;
- Апостальскі рух «Маргарытка»;
- Каталіцкія скаўты і скаўткі ў Беларусі.
Пасля прэзентацый прысутныя распачалі малітву на ружанцы, якую падрыхтавалі прадстаўнікі Легіёну Марыі. Вернікі далучалі апецы Багародзіцы кожны рух і супольнасць, а таксама свае сем’і, Касцёл і ўвесь беларускі народ. Напрыканцы адбылося Маёвае набажэнства.
Апоўдні распачалася святая Імша, якую ўзначаліў дапаможны біскуп Мінаска-Магілёўская архідыяцэзіі Юрый Касабуцкі. Напачатку ён прывітаў прысутных святароў, а асаблівым чынам ксяндза Кшыштафа Сэрока — сакратара Апостальскай нунцыятуры ў Мінску.
[3]
Таксама біскуп Юрый звярнуўся са словамі віншаванняў да ксяндза каноніка Уладзіслава Завальнюка, які ў маі адзначае 50-годдзе святарства.
Падчас прамоўленай гаміліі іерарх звярнуўся да прысутных і адзначыў, што рыхтуючыся да спаткання, цікавіўся, што на працягу гісторыі Касцёла казалі пра рухі і супольнасці розныя выбітныя асобы.
[4]
«Кожны з вас – гэта каштоўная пярліна ў вялікім калье, якое мы называем “Касцёл””, – зазначыў біскуп напрыканцы.
Дарэчы, менавіта ўдзел кожнай такой пярлінкі рабіў багатым, поўным і насычаным усё спатканне.
Святую Імшу ўпрыгожваў спевам хор “Effata” з мінскай парафіі Святога Яна Евангеліста і Святога Максімільяна Марыя Кольбэ, малітву верных падрыхтавалі ўдзельнікі руху факаляраў, працэсію з дарамі і разважанні да яе – супольнасць “Каштоўная пярліна”.
Пасля абеду прадстаўніцы руху “Маці ў малітве” распачалі адарацыю Найсвяцейшага Сакраманту, яе падхапілі сем’і з “Сужэнскіх сустрэч”, молячыся Каронку да Божай Міласэрнасці, а ўдзельніцы шанштацкага руху скончылі малітву Літаніяй да Найсвяцейшага Сэрца Езуса.
Ва ўсім адчувалася неверагодная сямейная атмасфера. Кожны адчуваў, што тут і зараз усе мы розныя, але ўсе мы – адна сям’я, члены аднаго Касцёла.
Пра важнасць смела крочыць за Хрыстом і быць разам, нягледзячы на выклікі сучаснага свету, перашкоды і цяжкасці, распавядаў падчас канферэнцыі на тэму «Касцёльныя рухі ў евангелізацыі Беларусі» айцец Андрэй Авен OCD.
У гэты час дзеці бавіліся на падворку касцёла разам з каталіцкімі скаўтамі і скаўткамі.
[5]
Спатканне закончылася цудоўнай працэсіяй: маленькія вернікі з кветкамі ў руках ішлі да алтара, каб утварыць са шматлікіх ружаў адно вялікае сэрца.
“Мы хочам, каб нашыя маленькія сэрцы біліся ва ўнісон з Найсвяцейшым Сэрцам Езуса”, – патлумачылі дзеці.
Напрыканцы разам з біскупам Юрыем адбыўся акт прысвячэння кожнага руху Найсвяцейшаму Сэрцу Езуса.
-
[6]
-
[7]
-
[8]
-
[9]
-
[2]
-
[10]
-
[11]
-
[12]
-
[13]
-
[14]
-
[15]
-
[16]
-
[17]
-
[4]
-
[18]
-
[3]
-
[19]
-
[20]
-
[21]
-
[22]
-
[23]
-
[24]
-
[25]
-
[26]
-
[27]
-
[28]
-
[1]
-
[29]
-
[30]
-
[31]
-
[32]
-
[33]
-
[34]
-
[35]
-
[5]
-
[36]
Вікторыя Філіпенка, тэкст
Леанід Юрык, фота