[1]З 17 па 22 жніўня 2026 года ў Браславе адбылася юбілейная, дзясятая летняя школа касцёльнага спеву. Творчае спатканне кантараў і спевакоў хору з розных парафій Беларусі традыцыйна было прысвечана Маці Божай Браслаўскай.
Арганізатарам мерапрыемства выступіла парафія Нараджэння Маці Божай і санктуарый, якія з годнасцю прынялі ўдзельнікаў школы.
Заняткі для кантараў і харыстаў праводзілі вопытныя касцёльныя музыканты:
- Уладзімір Неўдах – мастацкі кіраўнік Школы касцёльнага спеву, галоўны арганіст і капэльмайстар мінскага Архікатэдральнага касцёла Імя Найсвяцейшай Дзевы Марыі;
- Таццяна Брытко – хармайстар Архікатэдральнага хора;
- Іна Сапун – арганізатар школы і кіраўнік хора Санктуарыя Маці Божай Браслаўскай.
Спевы зводнага хору гучалі кранальна і ўзнёсла, дапамагаючы ўдзельнікам і вернікам у глыбокай малітве да Маці Божай.
[2]
Ксёндз Станіслаў Мжыглуд, пробашч і кусташ санктуарыя, звяртаючыся да ўдзельнікаў, падкрэсліў важнасць школы для развіцця касцёльнай музыкі ў Беларусі: “Дзейнасць школы грае кардынальную ролю ва ўзрастанні касцёльных музыкаў высокага ўзроўню. Служачы месцам спаткання музычных дзеячаў у доўгатэрміновай перспектыве, яна дасць неацэнныя плады не толькі для музычнай культуры касцёла на Беларусі, але і прынясе вялікі плён у развіцці і распаўсюджванні ўсёй багатай музычнай культуры Бацькаўшчыны”.
Падчас школы ўдзельнікаў наведаў ардынарый Віцебскай дыяцэзіі біскуп Алег Буткевіч.
На супольнай малітве перад цудадзейным абразом Маці Божай Браслаўскай быў выкананы спеў-малітва (словы Тэрэзы Крумплеўскай, музыка Уладзіміра Неўдаха):
1. Мы ідзём да Цябе, Твае дзеці,
Валадарка, на нас паглядзі.
З алтара ясны вобраз Твой свеціць,
Ты – апека для нашай зямлі.
Пр.: Маліся за нас да Сына,
да сэрца свайго прыгарні.
Народ і нашу Айчыну
ад грэху абарані.
2. З белых ружаў браслаўскага краю,
З чыстых сэрцаў сплятаем вянок.
Жыць мы годна Табе абяцаем
Па загадах, што даў нам Пан Бог.
3. Валадарка азёраў блакітных,
Прад Табой на каленях стаім
І з пакорай узносім малітву:
Паяднай, Маці, з Сынам сваім!
[3]
Юбілейная школа касцёльнага спеву яшчэ раз пацвердзіла, што літургічны спеў з’яўляецца неад’емнай часткай каталіцкай традыцыі і важным сродкам духоўнага ўзрастання вернікаў.
-
[1]
-
[2]
-
[4]
-
[5]
-
[3]
Паводле матэрыялаў waladarka.by [6]