[1]13 чэрвеня 2026 года ў касцёле Беззаганнага Зачацця Найсвяцейшай Панны Марыі ў мястэчку Удзела сабраліся сотні вернікаў, каб ушанаваць святога Антонія Падуанскага – сусветна вядомага цудатворцы і доктара Касцёла. Сёлетняе свята, якое выпала на час юбілейнага Года святога Францішка, стала асаблівым дзякуючы прысутнасці новапрэзбітараў.
Урачыстую Імшу цэлебравалі нядаўна высвечаныя святары — а. Уладзіслаў Молчан OFMConv і кс. Антоній Тышко.
Падчас прывітання а. Яраслаў Банасяк OFMConv адзначыў прыгажосць асобы святога заступніка парафіі: «Святы Антоній — гэта магутны вучоны, доктар Касцёла, знакаміты прапаведнік Божага слова. На выявах мы бачым яго з Бібліяй і ліліяй — сімвалам цнатлівасці і чысціні. Але з другога боку, ён быў простым і пакорным слугою Пана і братам нашага заснавальніка — св. Францішка Асізскага».
[2]
Ксёндз Антоній Тышко ў сваім разважанні прапанаваў тры «ключы» да разумення постаці святога з Падуі.
- Першы ключ — ключ мудрасці. Гэта не проста кніжныя веды, а здольнасць бачыць Бога ў штодзённым жыцці.
- Другі — ключ паклікання. Святы Антоній здолеў пачуць голас Пана сярод шумнага свету.
- Трэці — ключ місіі. «Гэты святы — не толькі знакаміты цудатворац і “знаходца” згубленых рэчаў, — падкрэсліў прапаведнік. — Ён — жывое Евангелле, якое працягвае прапаведваць праз сваю пакору і агонь Духа».
Кс. Антоній заклікаў вернікаў задумацца: «Ці не баюся я прапаведваць Евангелле? Бо мы з’яўляемся не толькі слухачамі, але і тымі, хто нясе іншым. Мы можам прапаведваць не толькі словам, але і тым, чым жывем — добрым прыкладам на працы, у дамах і ў сваім асяроддзі. Будзем прасіць св. Антонія, каб ён выпрасіў нам ласку не баяцца быць вучнем, заўсёды шукаць страчанае — і вярнуць сабе радасць веры».
Напрыканцы Імшы святар урачыста асвяціў хлеб у гонар святога Антонія — традыцыя, якую шануюць ва ўсіх францішканскіх касцёлах. Сімвалічны хлеб, які нагадвае аб цудзе святога, стане для парафіян духоўнай падтрымкай.
[3]
Пасля святой Імшы адбылося выстаўленне Найсвяцейшага Сакраманту. Святары і вернікі разам памаліліся Літаніяй да святога Антонія, услаўляючы яго дабрыню, цудадзейную моц і праўдзівую веру.
Кульмінацыяй духоўнага свята стала працэсія вакол касцёла. З малітвай і спевам вернікі крочылі вакол святыні, сведчачы аб тым, што святы Антоній і сёння йдзе побач з намі.
Самай кранальнай хвілінай стала магчымасць атрымаць прыміцыйнае бласлаўленне з рук новавысвечаных святароў. Для Удзела гэты дзень стаў не толькі ўшанаваннем вялікага святога, але і жывым сведчаннем маладосці Касцёла.
[4]
Так, у год юбілею, у Мястэчку Беззаганнай мы яшчэ раз пераканаліся: святы Антоній сапраўды вучыць нас мудрасці, каб служыць, і радасці, якую нішто не можа адабраць.
-
[1]
-
[5]
-
[6]
-
[7]
-
[8]
-
[2]
-
[9]
-
[10]
-
[11]
-
[12]
-
[13]
-
[14]
-
[15]
-
[16]
-
[17]
-
[18]
-
[19]
-
[20]
-
[3]
-
[21]
-
[22]
-
[23]
-
[24]
-
[25]
-
[26]
-
[27]
-
[28]
-
[29]
-
[4]
Марына Сінкевіч, тэкст
Леанід Юрык, фота