[1]У нядзелю 16 лютага глыбоцкі касцёл Святой Тройцы сустракаў парафіянаў і гасцей. А 13.00 тут распачалася святая Імша, а пасля яе – святочны канцэрт хору “Ave Maria”.
Хор паўстаў у 2000 годзе па ініцыятыве тагачаснага пробашча ксяндза Пятра Врубеля. І распачалося няпростае, але вельмі важнае служэнне: рэпетыцыі і напрацоўка рэпертуару, падрыхтоўка да аздаблення спевам Літургіі.
На ўсім шляху побач з харыстамі былі іх пастыры: ксёндз Кшыштаф Мікалайчык, ксёндз Мечыслаў Янчышын, ксёндз Вячаслаў Пялінак. Яны не толькі разам маліліся, але і ўдзельнічалі ў шматлікіх пілігрымках па святых месцах і проста цудоўна адпачывалі.
Сёння ў склад хору ўваходзіць 19 удзельнікаў рознага ўзросту і прафесій. Не кожны мае музычную адукацыю, але ўсіх аб’ядноўвае любоў да Бога, музыкі і спеву. На працягу 15 год кіраўніком хору была, святой памяці, Ніна Казлоўская. Апошнія 7 год гэта – Ганна Шакола.
[2]Ганна Шакола
Сваімі галасамі харысты не толькі штонядзелю, а таксама ва ўрачыстасці і святы, упрыгожваюць святую Імшу, але і ўдзельнічаюць у конкурсах і фэстах, спяваюць па запрашэннях у парафіях Віцебскай дыяцэзіі і за яе межамі.
За доўгія гады рэпертуар хору фармаваўся, паляпшаўся і ўзбагачаўся. Зараз у яго склад уваходзяць творы класічнай рэлігійнай і духоўнай музыкі, а таксама спевы беларускіх і замежных аўтараў.
Адметна, што падчас канцэрту ў касцёле прысутнічалі паэткі Марыя Ючкавіч і Алена Пажога. Менавіта яны з’яўляюцца аўтаркамі тэкстаў, што пакладзены на музыку і таксама гучаць у выкананні хору.
Канцэрт распачаўся ўзрушлівым момантам: спяваючы “Вядзе дарога да касцёла”, харысты ішлі ад уваходу храма да алтара, а прысутныя віталі іх стоячы.
[3]
Падчас імпрэзы прагучалі спевы на беларускай мове і лаціне. Інструментальна выступленне ўпрыгожылі Наталля Раманчук на клавішах і Марыя Чыжэўская на скрыпцы.
У ролі канферансье канцэрту выступіла ўдзельніца хору Надзея Цяліца, а Марына Сінкевіч падрыхтавала прэзентацыю з памятнымі фотаздымкамі і назвамі спеваў.
Напрыканцы прагучалі асаблівыя словы падзякі шматгадовай арганістцы хору Данаце Буторынай, усім удзельнікам канцэрту і тым, хто прыклаў намаганні, каб свята не проста адбылося, а стала прыгожым і цікавым.
Асаблівыя словы харыстаў былі звернутыя да пробашча парафіі ксяндза каноніка Мікалая Ціхановіча, які апроч малітвы і духоўнай падтрымкі зрабіў на юбілей падарунак у выглядзе новых касцюмаў.
[4]
Ад імя парафіянаў юбіляраў павіншавала Даната Сярогіна. Жанчына распавяла пра гісторыю хору, а таксама са шчаслівай удзячнасцю ўзгадала тую Імшу, калі ўпершыню зайграў вялікі арган і сцены храма напоўніліся галасамі харыстаў.
Словы падзякі скончыліся пажаданнямі заступніцтва Святой Цэцыліі і малітвай “Вітай Марыя”.
-
[3]
-
[5]
-
[6]
-
[7]
-
[8]
-
[9]
-
[1]
-
[10]
-
[11]
-
[12]
-
[13]
-
[14]
-
[15]
-
[16]
-
[17]
-
[2]
-
[4]
-
[18]
Вікторыя Філіпенка, тэкст
Леанід Юрык, фота і відэа