[1]Папа Леў XIV накіраваў прывітальнае пасланне рэдакцыі італьянскага тэлеканала навін «Tgcom24», заклікаўшы журналістаў быць адказнымі за праўду і будаваць культуру сустрэчы ў сучасным грамадстве.
З нагоды 25-годдзя заснавання італьянскай інфармацыйнай сеткі Пантыфік выказаў удзячнасць за штодзённую службу медыя на карысць грамадства. У свеце, дзе словы ў інтэрнэце занадта часта становяцца “крыклівымі”, задача сродкаў масавай камунікацыі ператвараецца ў асаблівую місію, якая патрабуе глыбокага сэнсу этычнай адказнасці.
Свабодная інфармацыя, што паважае годнасць чалавека, становіцца моцным інструментам для будавання трывалага міру.
Папа заклікаў журналістаў не спыняцца на паверхні хранікальных падзей, а глядзець з павагай, салідарнасцю і спагадай на “перыферыі пакут”. Святы Айцец падкрэсліў важнасць супрацьдзеяння фэйкавым навінам і прасоўвання наратыву, які яднае розныя часткі грамадства.
Інфармацыя, на думку Льва XIV, павінна служыць стварэнню супольнасці чытачоў і слухачоў, якія ідуць шляхам “бяззбройнага і нястомнага міру”. У завяршэнне ліста Пантыфік даручыў працу калектыву «Tgcom24» апецы святога Францішка Сальскага, апекуна журналістаў, і ўдзяліў апостальскае благаслаўленне супрацоўнікам і іх сем’ям.
кс. Аляксандр Амяльчэня, беларуская рэдакцыя [2] Vatican News