[1]Папа Леў XIV
Святы Айцец Леў XIV звярнуўся да сусветных лідараў з заклікам спыніць агонь і адмовіцца ад зброі, падкрэсліўшы, што толькі шчыры дыялог здольны спыніць рост насілля і смерць шматлікіх людзей.
Вечарам 24 сакавіка 2026 года, знаходзячыся ў Кастэль Гандольфа, Пантыфік сустрэўся з групай журналістаў каля рэзідэнцыі «Віла Барберыні». Пасля кароткага адпачынку і працы Святы Айцец палічыў неабходным зноў заклікаць да міру, які сёння знаходзіцца пад пагрозай у выніку няспынных канфліктаў.
Папа патрабуе ад палітыкаў канкрэтных крокаў да паразумення
Папа Леў XIV выказаў глыбокую заклапочанасць міжнароднай сітуацыяй, дзе назіраецца эскалацыя нянавісці. Паводле яго слоў, насілле становіцца ўсё больш жорсткім, а колькасць ахвяр няўхільна расце.
Папа звярнуў увагу на тое, што больш за мільён чалавек апынуліся ў ізаляцыі, стаўшы закладнікамі ваенных дзеянняў. «Мы хочам маліцца за мір, але я заклікаю ўсе ўлады па-сапраўднаму працаваць праз дыялог для вырашэння праблем», — адзначыў Наступнік Пятра.
Гэты заклік стаў працягам думак, выказаных Папам падчас нядзельнай малітвы «Анёл Панскі». Тады Леў XIV са шчырым узрушэннем казаў пра сітуацыю на Блізкім Усходзе і ў іншых рэгіёнах, што пакутуюць ад войнаў. Ён падкрэсліў, што пакуты нявінных ахвяр – гэта скандал для ўсёй чалавечай сям’і і «крык перад абліччам Бога».
Малітва і дыялог як адзіны шлях да захавання годнасці
Біскуп Рыма ўпэўнены, што маўчанне перад тварам такой трагедыі немагчымае. Ён заклікаў вернікаў не спыняць малітву, а палітыкаў – шукаць рашэнні, якія будуць грунтавацца на павазе да годнасці кожнага чалавека. На думку Папы, толькі шчырасць у перамовах можа адкрыць шляхі да трывалага міру, якога так чакае свет.
кс. Аляксандр Амяльчэня, беларуская рэдакцыя [2] Vatican News