[1]9 жніўня ў будынку Канферэнцыі Каталіцкіх Біскупаў у Беларусі ў Мінску адбыўся другі тур уступнага экзамену для кандыдатаў на першы год навучання ў Вышэйшых духоўных семінарыях у Гродне і Пінску.
Экзаменацыйныя пытанні датычыліся Катэхізісa Каталіцкага Касцёла, жыцця паўсюднага і мясцовага Касцёла, яго структуры з мэтай лепш ацаніць зацікаўленасць кандыдатаў тым, як жыве Касцёл.
Акрамя таго, кандыдатам трэба было растлумачыць матывы свайго выбару следаваць за Хрыстом, які кліча іх да служэння ў Яго аўчарні ў якасці святароў.
Экзаменацыйная камісія, праінфармаваўшы пра сваё рашэнне біскупаў ардынарыяў, з чыіх дыяцэзій паходзяць кандыдаты, і атрымаўшы іх благаслаўленне і згоду, паведамляе, што новымі студэнтамі Міждыяцэзіяльнай вышэйшай духоўнай семінарыі ў Гродне сталі двое кандыдатаў:
- Максім Ленец (парафія Божага Цела, Крамяніца, Гродзенская дыяцэзія);
- Іван Шаранговіч (парафія святога Андрэя, апостала, Крывічы, Мінска-Магілёўская архідыяцэзія).
Новымі студэнтамі Вышэйшай духоўнай семінарыі імя святога Тамаша Аквінскага ў Пінску таксама сталі двое кандыдатаў:
- Іван Аляхновіч (катэдральная парафія Унебаўзяцця Найсвяцейшай Панны Марыі, Пінск, Пінская дыяцэзія);
- Георг Аляксандр Скрабец (парафія Узвышэння Святога Крыжа, Брэст, Пінская дыяцэзія)
[2]
Нагадаем, што па выніках першага туру [3] ўступнага экзамену студэнтамі Міждыяцэзіяльнай вышэйшай духоўнай семінарыі ў Гродне ўжо сталі трое кандыдатаў.
Такім чынам, у новым навучальным годзе падрыхтоўку да святарства ў духоўных семінарыях Беларусі распачнуць сямёра кандыдатаў.
Адказныя за фармацыю духавенства просяць усіх людзей добрай волі аб малітве ў інтэнцыі новых семінарыстаў, а таксама аб новых і святых пакліканнях да святарства.
Кс. Павел Эйсмант, Catholic.by [4]