[1]За два дні да пачатку апостальскага падарожжа Папы Льва XIV у Іспанію кіраўнік Залы Друку акрэсліў асноўныя сэнсавыя прыярытэты гэтай чаканай і маштабнай падзеі.
Папа з 6 па 12 чэрвеня 2026 года здзейсніць сваё чацвёртае міжнароднае апостальскае падарожжа, у межах якога наведае Мадрыд, Барселону і Канарскія астравы.
Падчас брыфінгу кіраўнік Залы Друку Матэа Бруні падкрэсліў, што гэты візіт на зямлю старажытных хрысціянскіх традыцый выклікае велізарнае чаканне – на розныя мерапрыемствы ўжо зарэгістраваліся каля паўмільёна вернікаў. Іспанія, якая гістарычна была “майстэрняй дыялогу” і радзімай вялікіх святых, такіх як Тэрэза Авільская і Ян ад Крыжа, гатова прыняць Пантыфіка для сур’ёзнай размовы пра будучыню Еўропы.
Напярэдадні маштабнага падарожжа на першы план выходзяць пытанні глабальнай бяспекі і пераадолення падзелаў.
Галоўнымі сэнсавымі восямі дваццаці трох выступленняў Святога Айца стануць мір і раззбраенне. У эпоху, пазначаную лакальнымі войнамі, Папа будзе гаварыць пра неабходнасць пераадолення палярызацыі грамадства, абапіраючыся на ідэі новай энцыклікі «Magnifica humanitas». Як адзначыў Бруні, голас Касцёла павінен прагучаць вельмі выразна «ў час апраўдання выкарыстання зброі». Пантыфік нагадае Еўропе, што абарона кожнага чалавечага жыцця, асабліва самага безабароннага, з’яўляецца іспытам на маральную сталасць грамадства.
Адметнасцю гэтага візіту стане тое, што Папа прагне пазнаць краіну праз вымярэнне ўразлівасці і чалавечых перыферый. Адразу пасля афіцыйных сустрэч у Мадрыдзе Папа Леў XIV наведае сядзібу сацыяльнага праекта «Cedia 24 Horas», які займаецца дапамогай бяздомным і безабаронным людзям у квартале Лусэра.
Пазней, на Канарскіх астравах, Пантыфік сустрэнецца з мігрантамі ў порце Аргінегін, які доўгі час быў эпіцэнтрам драматычных падзей на атлантычным маршруце. У цэнтры прыёму «Лас-Раісэс» Папа нават звернецца да выхадцаў з Афрыкі на французскай мове, дэманструючы блізкасць да іх пакут.
Сустрэча з жывой верай іспанскага народа адкрые новыя перспектывы для секулярызаванага грамадства.
Нягледзячы на высокі ўзровень секулярызацыі, Іспанія захоўвае глыбокія каталіцкія карані, якія выяўляюцца ў народнай пабожнасці. У нядзелю 7 чэрвеня 2026 года Папа Леў XIV прыме ўдзел у традыцыйнай працэсіі Божага Цела, што стане сведчаннем веры, якая «не зачыняецца ў касцёлах, а крочыць па вуліцах».
Яшчэ адным сімвалічным пунктам падарожжа будзе Барселона, дзе 10 чэрвеня 2026 года, у сотую гадавіну смерці славутага архітэктара Антоніа Гаўдзі, Пантыфік урачыста адкрые Вежу Езуса ў храме «Саграда Фамілія».
Асаблівае пасланне Наступнік Пятра скіруе да маладых людзей, каб дапамагчы ім убачыць хрысціянскі ідэал у складаным свеце. Прадстаўнік Святога Пасада заўважыў, што «ў часы моцных людзей Касцёл павінен працаваць над тым, каб выхаваць людзей святых».
У паездцы Папу будуць суправаджаць, між іншым, кардынал Анхель Фернандэс Арцімэ і арцыбіскупы Філіпа Янонэ і Луіс Марын дэ Сан-Марцін.
Адказваючы на пытанні журналістаў аб праблеме злоўжыванняў у Касцёле ў Іспаніі, Бруні згадаў сумесны касцельна-дзяржаўны пратакол, прыняты ў сакавіку 2026 года, аднак удакладніў, што прыватная сустрэча з ахвярамі на гэты момант не запланавана.
Кс. Аляксандр Амяльчэня — беларуская рэдакцыя Vatican News [2]