LEGO замест казання? Пазнаёмцеся са святаром, які стварае незвычайныя мадэлі, якія набліжаюць да Бога

Святар Томас Эльберт паказвае, што LEGO можа быць не толькі цацкай, але і інструментам для евангелізацыі. Святар узнаўляе біблейныя сцэны і выкладае рэлігію ў творчай форме, заахвочваючы студэнтаў да стварэння мадэляў, натхнёных Святым Пісаннем.

У інтэрв’ю парталу katholisch.de айцец Томас Эльберт прызнаецца, што яго захапленне пачалося падчас пандэміі каранавіруса. Адным з яго заняткаў у той час было будаўніцтва з блокаў LEGO, і паколькі ў мінулым, падчас вучобы Вюрцбургу, ён вывучаў Біблію і Новы Запавет, вырашыў спантанна сабраць калядную сцэну нараджэння з блокаў LEGO. Вынік яго працы быў успрыняты з такім энтузіязмам, што святар вырашыў аналагічным чынам адлюстраваць іншыя біблейныя падзеі.

Цяпер айцец Томас выкарыстоўвае сваё захапленне як інструмент для евангелізацыі. Паколькі ён не мог прапанаваць вучням будаўніцтва з LEGO падчас школьных урокаў, ён арганізаваў пазакласныя мерапрыемствы, якія хутка набылі папулярнасць. Падчас гэтых заняткаў ён і вучні змаглі замацаваць веды, атрыманыя на ўроку, у займальнай форме — ствараючы сцэны з блокаў.

«Напрыклад, тэмай гэтага года была біблейная чума. Вучні пабудавалі цэлы свет жаб. Такія вобразы сапраўды запомніліся дзецям. Тыповыя біблейныя гісторыі для дзяцей звычайна вельмі падыходзяць для ўсіх жывёл і пейзажаў. Біблія поўная прыгожых гісторый і з LEGO можна пабудаваць так шмат рэчаў», — адзначае святар.

Кс. Томас падкрэслівае, што прайграванне біблейных сцэн з дапамогай LEGO не мае нічога агульнага з інфантылізмам і не прымяншае іх сур’ёзнасці. Усё гэта дзякуючы таблічкам, якія ён размяшчае побач са сцэнамі, якія стварае — на іх заўсёды ёсць дакладнае апісанне таго, што яна ўяўляе, і кантэкст.

Нямецкі святар падкрэслівае, што стварэнне яго мадэляў LEGO ўключае ў сябе розныя этапы, у тым ліку планаванне. Многія з яго ідэй належаць яго вучням. Ён знаходзіць і заказвае блокі, неабходныя для стварэння біблейскіх сцэн у Інтэрнэце.

«Напрыклад, калі я кажу, што ў наступным годзе хачу пабудаваць Майсея на гары Харэб, я правяраю, колькі блокаў шэрага колеру мне патрэбна для гары. Паколькі я сам распрацоўваю дызайн амаль усіх сцэн, часам мне патрэбна больш дэталей, чым я чакаў на этапе будаўніцтва. Тады я проста заказваю больш, альбо нам даводзіцца ўносіць некаторыя змены ў сцэну», — тлумачыць святар.

Стварэнне біблейных мадэляў з дапамогай LEGO — гэта не толькі спосаб евангелізацыі, але і тое, што робіць айца Томаса шчаслівым.

«Ёсць прымаўка: наша задача як хрысціян — несці радасць свету. І калі я бачу столькі людзей, якія пакідаюць выставу з шчаслівымі тварамі, я сам шчаслівы», — тлумачыць айцец Томас Эльберт.

Паводле deon.pl
Пераклад Марыны Ткач

 для друку