[1]У іспанскім горадзе Таледа кляўзуровыя францішканкі з кляштара Святога Антонія маюць незвычайную місію. Сёстры ўзяліся за выратаванне адной з самых рэдкіх парод хатняй жывёлы ў краіне — гіганцкага іспанскага труса.
Гігант сярод трусоў
Conejo gigante de España — гэта парода, якая вылучаецца сваімі вялікімі памерамі. Дарослыя асобіны могуць важыць каля 9 кілаграмаў і дасягаць даўжыні амаль аднаго метра. Дзесяцігоддзі таму гэтых жывёл звычайна разводзілі ў сельскай мясцовасці Іспаніі, асабліва ў цяжкі перыяд пасля Грамадзянскай вайны, калі яны былі важнай крыніцай ежы.
Аднак з часам на іх месца прыйшла прамысловая вытворчасць мяса, і традыцыйная парода пачала хутка знікаць.
Сёння адным з ключавых месцаў, дзе захавалася папуляцыя гэтых жывёл, з’яўляецца францысканскі кляштар у Таледа. Там сёстры разводзяць некалькі дзясяткаў дарослых трусоў, кантралюючы кожны аспект іх утрымання. Іх праца не абмяжоўваецца штодзённым доглядам. Сёстры вядуць радаводныя запісы, сочаць за размнажэннем і супрацоўнічаюць з навукоўцамі, каб падтрымліваць максімальна магчымую генетычную разнастайнасць пароды.
Выратаванне гіганцкага іспанскага труса — складаная місія
Утрымліваць племянную ферму няпроста і не танна. Выдаткі дасягаюць некалькіх тысяч еўра штогод і ўсё гэта патрабуе глыбокіх ведаў і дакладнай арганізацыі працы.
[2]
Дадатковым абмежаваннем з’яўляецца адсутнасць камерцыйнага продажу жывёл або мяса. Законныя сёстры могуць перадаваць трусоў толькі іншым заводчыкам, школам або навучальным установам. Гэта значна абмяжоўвае фінансавы патэнцыял праекта і азначае, што яго ўтрыманне ў першую чаргу залежыць ад унутраных рэсурсаў кляштара.
Навука, традыцыі і духоўнасць
Нягледзячы на тое, што гэта можа здавацца незвычайным, праца сясцёр францішканак высока ацэньваецца экспертамі. Іх падыход спалучае навуковую дакладнасць з пастаянным клопатам пра захаванне рэдкай пароды.
Для сясцёр гэта не проста племянны праект. Клопат пра жывёл адпавядае францысканскай духоўнасці, якая падкрэслівае адказнасць чалавека за стварэнне. У іх разуменні абарона знікаючай пароды з’яўляецца натуральным працягам чуласці, натхнёнай святым Францішкам Асізскім.
deon.pl [3]
Пераклад Марыны Ткач
Фота: Catholic Arena